The Definitive Guide to Living in the Capital , Cairo , Egypt

موجود في نهاية شارع إبراهيم اللقاني بالقرب من قصر الاتحادية بمصر الجديدة، محل صغير يا دوب تقدر تدخل لوحدك بالجنب علشان توصل للكاونتر اللي قاعد عليه صاحب المحل، محل “رستن” من أقدم محلات الساعات في المنطقة، مشهور في الأصل بأنه بيصلح ويركب قطع غيار للساعات بأنواعها المختلفة، لكن بجانب ده عنده موديلات محدودة من ساعات اليد الكوارتز أو العقارب والساعات الرقمية، وكله معروض في واحدة من أصغر الفتارين اللي شوفناها في حياتنا، لكن ده ما يمنعش أنك عينك هتزغلل من كثر الساعات المعروضة وهتلاقي نفسك واقف مدة طويلة مستمتع بكل التشكيلة دي.

الأسعار المكتوبة على كل ساعة هتغريك أنك تدور أكثر يمكن تلاقي أرخص، وهو ده الحلو في المحلات القديمة اللي بتتبع بالطريقة الكلاسيكية في العرض، وبتخلينا في بعض الأحيان نفضلها عن المحلات الكبيرة الموجودة في المولات والشوارع التجارية الكبرى.

بنشوف محل “رستن” من بعيد وكنا مش متخيلين أننا في يوم من الأيام ممكن نكتب عنه، لأنه زي ما قلنا أصغر من اللازم، ومستخبي أكثر من اللازم، لكن بمجرد ما قربنا منه لاقينا أنه يستاهل فعلًا أننا نعرف الناس به، لأنه بجانب التصليح بمهارة ودقة فائقة وده عن تجربة بعض أصدقائنا هناك، لقينا عنده ساعات من ماركات عالمية أصلية بأسعار كويسة جدًا، بجانب مجموعة من الساعات غير الأصلية أو الـ First Copy زي ما بيقولوا وهي أحسن درجات التقليد من موديلات سويسرية زي تاجور ورولكس وزينيث وأيدوكس وتيسوت.

الموديلات الأصلية من الساعات دي أسعارها بتتراوح ما بين 25000 لـ 5000 جنيه وفيه موديلات طبعًا فيها ماء ذهب وأحجار كريمة بتوصل لأرقام خيالية، لكن هنا هتلاقي كل الموديلات اللي تتخيلها وبتقليد عالي الجودة مش هتقدر تفرقه عن الأصل، وبمكونات يابانية أصلية وبأسعار من 400 لـ 1000 جنيه بس، الفرق هنا أنها مش ضد الماء، وطبعًا مش بالضمان.

نروح بقى للموديلات الأصلية وهي ألبا وسيتزن وكاسيو، أسعارها زي التقليد تقريبًا من 400 جنيه لحد 900 جنيه، موديلات أنيقة جدًا ومعظمها رجالي، أستيك معدن أو جلد أسود وبني، وممكن تغير أستيك أي ساعة أو تبدل المعدن بالجلد أو العكس، فيه كمان موديلات الـ Q&Q بأسعارها اللي في متناول الجميع، من أول 150 جنيه لحد 300 جنيه ممكن تجيب ساعة حلوة وعملية. والساعات الرقمية هنا كلها كاسيو، وهتلاقي الموديلات الكلاسيكية منها وأشكال رياضية حديثة، وفيه ستوب ووتش كمان بأسعار كويسة، وطبعًا الميزة الأهم في الموديلات الأصلية دي أنها ضد الماء.

ميزة المحل ده أنك بتحس بتكلف وأنت واقف تتفرج أو بتستفسر عن أي حاجة، كأنك واقف مع واحد صاحبك بتسأله عن رأيه في مواصفات الساعة وشياكتها، لكن كان نفسنا يبقى فيه مراية علشان نعرف نشوف الساعات من بعيد، شكلها بيختلف برضه. تجربتنا في “رستن” كانت حلوة علشان الأمور فيه كانت واضحة؛ الأصلي واضح والتقليد واضح، والفرق معروف، مافيش خداع أو تضليل زي ما بنشوف في محلات ثانية وللأسف بتبقى مشهورة ولها سمعة.