دليل كايرو 360 لشراء أو عمل هدايا مميزة ومبتكرة فى القاهرة
Nagla Ashraf
الهدايا دي تعتبر شيء خاص جدًا، فيه ناس بـ تعتبرها مجرد مجاملة أو شكليات، وفيه ناس بـ تحب تعبر عن حبها من خلالها بس ما بـ تعرفش تجيب إيه؟ وده السبب الرئيسي لفكرة الموضوع ده، بس قبل ما ندخل في التفاصيل أهم من الهدية نفسها المشاعر اللي هـ تكتبها لصديقك أو أهلك اللي هـ تجيب لهم الهدية، لأن الصدق ده هو اللي هـ يبان في الآخر وهو اللي هـ يُقدر مهما كانت الهدية بسيطة أو مكلفة، قيمتها من قيمة مشاعرك وتقديرك.
كل شوية بـ تيجي مناسبة مهمة محتاجة لهدية إما يوم ميلاد حد من أصحابك أو خطوبة أو ولادة أو حتى حد مسافر وعاوز تهاديه بحاجة مميزة تفكره بك، أو بمناسبة الكريسماس اللى بـ يفصلنا عنه أيام معدودة.
هدايا الأصدقاء:
فكرة الصندوق السحري: بـ يبقى فيه كل أنواع الشوكولاتة والبونبوني والمارشميلو وداخله بقى: يا إما صوركم سوا على مدار السنين في ألبوم ومعاه جملة على كل صورة مبهجة، أو ورق صغير فيه جمل أثرت فيكم أنتم الاثنين، وممكن تكتب لهم رسالة بطريقة كوميدية أو جدية على حسب شخصياتكم بـ توصف فيها قد إيه الصداقة دي أثرت فيكم أنتم الاثنين.
أو ممكن لوحة فحم رسام رسمها لصورة تجمعكم (ملحوظة لازم الرسام يكون موثوق فيه علشان ساعات بـ تطلع صور عجيبة)، أو قطعة بازل عليها صورة أو كلام معبر عن الموقف ودي بـ تتعمل عادي بس من محلات معينة، أو صور مدبسة وراء بعض فيها مراحل صداقتكم سنة وراء سنة وفي الآخر هـ نكبر سوى مثلاً.
هدايا الأمهات:
المحلات بـ تبقى مليانة حاجات بس لو عاوز تقدم حاجة مختلفة ممكن تجيب كتب للتربية أو مقولات للطفل يشوفها لما يكبر زي نصائح صغيرة في كل مرحلة في حياته، كمان ممكن تجيب حاجة أنت عارف أن الأم محتاجاها من لوازم الطفل، وممكن تعمل لوحة عليها مقولة مشهورة أو حكمة تتعلق في غرفة الطفل.
ولو هي حد قريب منك تجيب لها ملابس، لأن بعد الولادة جسم الأم بيختلف عن قبلها. أو كريمات للعناية بالبشرة والشعر أو برفان، لأنها في الفترة دي برضه بـ تهتم قوي بصحة الطفل وبـ تنسى نفسها، فخليكم فاكرينها أنتم.
هدية لحد مسافر:
يستحسن تجيب له حاجة يفتكرك بها زي تابلوه أو تصور له فيديو مضحك يشغله وهو مسافر خاصة لو أنتم مجموعة أصحاب، هـ تبقى حلوة قوي.
وممكن تشتري له كتاب أنت قرأته وعجبك، وتكتب له في صفحات معينة تعليقك، كأنك بـ تقرأ الكتاب معاه، أو برضه حاجة هو محتاجها سواء من ملابس أو شنط لو أنتم قريبين من بعض.
الجزء المغري بقى هو طريقة لف الهدية لأننا من الأشخاص اللي بـ يحبوا يحتفظوا بشكل الهدية الجميل، حاول تلفها عند محل محترف مع بلالين، علشان لما يشوفها يفرح.
هدية لحد مريض:
طبعًا غير الدعاء والشوكولاتة والورد، ممكن نجيب له بالونات كثيرة هيليوم معلقة فيها مصاصات وشوكولاتة، لو مسموح له يأكل الحاجات دي.
ممكن كمان نعمل له تي شيرت مخصوص عليها اسمه، أو جملة زي "حمد الله على سلامتك"، والحاجات دي بقى بـ تتعمل عادي دلوقت مش صعبة.
أو تجيب فرخ كبير وتحط فيه صور لصاحبك أو قريبك المريض، وكلام لك ولصحابك أو العائلة تشجعه أنه يقوم بالسلامة أو تهنيه على سلامته.
هدية للمتزوجين جديد:
الموضوع ده بـ يبقى محير جدًا، خاصة لو العروسين مش عاملين قائمة بالحاجات اللي محتاجينها وأماكنها، أو مش قريبين قوي لدرجة أنك تقول لهم حابين تجيب لهم إيه أكثر.
فيه هدايا تقليدية زي برواز ينفع للشقة أو تحفة قديمة زي الشمعدان الفضة أو فازة أو زرع.
وطبعًا فيه الهدايا غير التقليدية، زي مثلًا أنك تعمل بيت صغير عند النجار على شكل بيت كرتون فيلم Up، وتحط فيه بالونات من فوق وتكتب أسماء أصحابك عليه، هـ يفرحوا به قوي، أو أنك تعمل لهم بوستر كبير يُعلق في بيتهم فيه صورتهم هم الاثنين مع كلمة مميزة زي "مودة" و"رحمة"، أو "بيتهم نور"، أو "الصحاب الجدعان"، اللي تحسوه لائق على شخصياتهم، وفيه أفكار مختلفة عن الموضوع ده كثير زي صور الكرتون بشكلهم، أو زي كوميكس Comics مضحكة عليهم.
ممكن كمان تجيب لهم أجندة فاضية شكلها مميز وقيمة، وفيه منهم كثير في المكتبات زي مكتبة "أ" و"قرطاسية ديوان"، وتقترح عليهم يكتبوا يومياتهم والصعوبات اللي بـ يواجهوها كل يوم وإزاي تغلبوا عليها أو لسه عايشين فيها، تبقى ذكرى حلوة لهم مع بعض، وممكن يبقى حجمها كبير يقدروا يحطوا فيها صور لهم كمان.
دي عناوين محلات هدايا هـ تنفعكم في جميع أنحاء القاهرة:
Sugar له فرعين في سيتي ستارز وفي سيتي سنتر المعادي.
Monte Carlo في الزمالك.
جراب أند راب في المهندسين.
كاو في المهندسين.
كاكادو في مدينة نصر.
هدية في الدقي، للأمهات ومستلزمات الأطفال.
بيت الهدايا في وسط البلد.
كارفان سراي في الزمالك لأثاث المنزل.
أرتسي في الزمالك لأثاث المنزل.
الهدية عامة قيمتها وحلاوتها بـ يبقى في مقدار الحب اللي في قلبك للناس دي، لا ثمنها أو شكلها أوجودتها هـ يفرقوا، لو مافيش محبة وود ما بينكم، الهدية مش هـ توجدها، بس هـ تؤكدها.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
