درب البرابرة: لوازم سبوع وجهاز وأي حاجة تانية تحتاجها
Salma Tantawi
سوق
العتبة موجود في القاهرة من أكتر من 100 سنة، وهو ميدان حيوي في قلب العاصمة؛ وسط البلد. هناك هـ تلاقي كل حاجة ممكن تحتاجها، والبياعين بـ
يكونوا دؤوبين على كسب الزبون وبيع بضاعتهم قبل غيرهم. السوق كبير قوي وبـ يمتد في
شوارع فرعية كتير فيها عدد لا نهائي من المحلات.
لمّا
تلاقي زقاق ضيق ومنور جداً بأنوار كتيرة لدرجة إنك ممكن تشوفه من بعيد جداً، يبقى
دي أكبر علامة تدلك إنك وصلت «درب البرابرة»، المكان اللي تروحله وإنت مغمض لو
عايز تِحَضَر لفرح، سبوع طفل، أو أي حفلة تانية.
هناك
هـ تلاقي كل حاجة، من أول اللمبات الصيني والنجف الورق واللي أسعارهم بـ تبتدي من
5 جنيه، ولغاية النجف الكريستال الأصلي الفخم اللي يسوَاله آلاف الجنيهات. مفيش شكل
ولا نوع ولا جودة ولا حتى ذوق واحد مش موجود هناك. فيه كمان حرفيين هناك متخصصين
في تصليح أي حاجة بتكلفة قليلة جداً. فيه تشكيلة
متنوعة هناك من ديكورات وتحف البيت، وكل ده بـ يخللي «درب البرابره» من أحسن
الأماكن اللي ممكن تروحها عروسة بـ تِجَهِز بيتها، خصوصاً اللي محتاجة حاجات
كويسة ورخيصة في نفس الوقت.
«درب
البرابره» هو أحسن وغالباً أرخص مكان تجيب منه لوازم سبوع الأطفال. المستلزمات
التقليدية اللي ممكن أي حد يحتاجها لأي سبوع هـ تلاقيها أكيد هناك، زي العلب
الصغيرة اللي فيها بونبون اللوز والشوكولاتة. العلب في منها كل الأشكال والأحجام،
وسعرها بـ يبقى في حدود 2 ، 5
جنيه مصري للعلبة. ممكن برضه تشتري الحلويات من نفس المحل. وفي جميع الأحوال الأحسن إنك تاخُد لَفَة
على كل المحلات قبل ما تشتري عشان تقارن الأنواع والأسعار.
السوق
جوه إحتفالي ومبهج، ومليان بالأنوار وأشكال وألوان الزينة، لدرجة انه هـ يخلليك عايز
تِعمِل حفلة حتى لو ماعندكش مناسبة. تقريباً عنده الزينة بتاعة كل أنواع الحفلات
الممكنة، سواء عيد ميلاد، حفلة تخرج، سبوع، حتى البلالين اللي مكتوب عليها خِف
بسرعة أو «Get Well Soon» لو
رايح تزور حد عَيَّان. الحاجات هناك رخيصة بس جودتها مش دايماً حلوة زي الأماكن
الغالية التانية اللي في القاهرة، بس عامةً مش بـ تفرق كتير خالص. الأسعار رخيصة
جداً لدرجة انك ممكن تِرَتِب لحفلة كاملة بأقل من 20 جنيه مصري. فيه كمان النجف
الورق اللي على شكل فواكه وحيوانات ونجوم، وأسعارهم بـ تبقي ما بين 5 لـ20 جنيه مصري للقطعة الواحدة.
لو
معاك عربية وعايز تروح «درب البرابرة»، ممكن تركنها في جراچ العتبة اللي فيه كذا
دور. بس في جميع الأحوال لو أخدت المترو هـ يبقي أسهل لك وهـ توفر وقت كتير بدل ما
تِفضَل تِدَوَر على رَكنة. ماتنساش تلبس لبس مناسب وإنت رايح، خاصة لو بنت، ولو انت
شخص مش بـ يستريح في الزحمة، خللي بالك لأن الناس هناك بـ تبقى فوق بعضها.
«درب
البرابرة» يبقى واحد من أقدم أسواق القاهرة، اللي بـ يجمعلك كل اللي انت محتاجه في
مكان واحد، لكن للأسف بسبب رواج السلع السياحية في السوق، الطابع السياحي ابتدى
يغلب عليه، ومابقاش السوق الشعبي اللي الواحد متعود عليه بتاع زمان.
مقترح
تليفزيون
مسلسل 6 شهور: إزاي تحقق التارجت وتعمل دراما من غير مط ولا تكرار؟!
اعمال وتش ات الاصلية مراد مكرم +5
فن وثقافة
