The Definitive Guide to Living in the Capital , Cairo , Egypt

بما إننا داخلين على حدث رياضي مهم وتاريخي بالنسبة لعشاق ومشجعي كرة القدم وهو كأس الأمم الأفريقية، فكان لازم الحدث ده ياخد الشكل اللي يليق بيه، سواء بقى في استقباله أو التحضيرات ليه، وأكيد حضوره.

وفي توقيت البطولة، ولحد فترة طويلة بعدها، بنلاقي دايمًا الإعلام والسوشال ميديا بيركزوا على الجانب الترفيهي أو الفني أو حتى الإنساني لجماهير البطولة، وتلاقيهم دايمًا بيحكوا على أشكال وطرق احتفالات، أو دموع انكسارات وهزايم، أو بتركز على شوش بتحكي تاريخ طويل من عشق الكورة وأهلها، وبيظهروا الشحنات العالية من التشجيع، والأصوات المبحوحة من الهتاف، وعلشان كده دايمًا بتكون المدرجات مسرح مهم، ومش أقل أهمية أبدًا من أرض الملعب.

وعلشان تكون جماهير “مصر” دايمًا في صورة تليق بالبطولة المقامة على أرضها، كل واحد فينا فكر إزاي يكون الأحسن والأفضل وحتى كمان الأشيك أو الأكثر جاذبية بين جماهير أفريقيا، وعلشان ده كله، مجموعة شباب مصريين قرروا يشاركوا ويدعموا الجماهير المصرية في البطولة، بتصميمهم لتي شيرت مميز وخاص بالمشجعيين المصريين في البطولة.

اتكلمنا مع اتنين من مؤسسي شركة “سيجما – Sigma Fit Egypt” المصرية لتصميم الملابس الرياضية، واللي كان ليها السبق في تنفيذ أول تي- شيرت خاص للمشجع المصري، واللي كان من تصميم شركة مصرية أسسها شباب مصريين برده، وهي شركة (Endorphins art lab) واللي اشتهرت بتصميماتها الخرافية والمميزة لـ تي – شيرت وطيارة وأتوبيس المنتخب القومي في كأس العالم، واللي لاقت نجاح كبير على السوشال ميديا، لكن للأسف ما اتنفذتش في وقتها على أرض الواقع، على الرغم من إنها كانت جذابة ومعبرة عن الهوية المصرية.

“عمر المنير” و “إسلام رشوان” هما الشباب اللي بدأ الحلم، وكلمونا عن الدافع وراء فكرة التي – شيرت ده، وخاصة بعد ما فاتهم كاس العالم، والدافع هوه إن تصميم التي- شيرت الرسمي لمنتخب مصر في البطولة دي أحبط كثير من المشجعين، فكان لازم ناخد خطوة نرضي بيها ذوق المشجعين، وفي نفس الوقت ندعم صناعتنا بالتكنولوجيا العالية.

وبخصوص التكنولوجيا، فاحنا عرفنا في كايرو 360 إن التي- شيرت اللي قدمته شركة “سيجما” معالج بتقنيات حديثه مقاومة للعرق والبكتريا، وسعره هيكون في حدود الـ 200 أو250 جنيه، ده غير إن الشركة دخلت في مفاوضات مع أكثر من شركة من الرعاة للمنتخب المصري علشان يوردوا ليهم التي- شيرت علشان يستخدم كهدية لعملائها.

شركة “سيجما” للملابس الرياضية، شركة مصرية، صحيح بدأت سنة 2017، لكن بفضل التكنولوجيا المتطورة اللي بتستخدمها في تصنيع الملابس، قدرت إنها تسمع ويكون ليها جمهور عريض في أوساط الشباب المصري، جمهور مايقلش عن جمهور البراندات العالمية في الملابس الرياضية، ده غير إنها فتحت سوق للملابس الرياضية المدعومة بالتكنولوجيا الحديثة في دول كتير منها الكويت وأمريكا.