The Definitive Guide to Living in the Capital , Cairo , Egypt

مين فينا ممكن يقاوم فكرة الخروجة المتكاملة وغير المكلفة؟ خاصة لو الخروجة دي هتكون للترفيه والشوبينج مع بعض، وكمان هنزود عليهم نوستالجيا زمان. المكان ده هو المعادي جراند مول، من أقدم المولات التجارية في القاهرة، واللي أعاد اكتشاف نفسه من جديد بعد التطوير، وبقى من أهم الوجهات اللي لازم تزوروها في خروجاتكم مهما كانت متطلباتكم، علشان المول هيغنيكم عن الخروج بره لأي حاجة.

خلال السطور الجاية هنقول لكم على كل اللي محتاجين تعرفوه عن المعادي جراند مول.

المعادي جراند مول موجود في شارع 250، وموقعه متميز، وقريب من مترو المعادي ومترو ثكنات المعادي، وكمان لوجود جراج كبير تحته وكمان في المساحات الخارجية اللي حواليه على مدى 4 شوارع، وهو مكون من 5 أدوار، وفيه محلات كتير جدًا وكافيهات وكمان محلات خياطة مشهورة.

في البدروم هتلاقوا مجموعة كافيهات وكمان مجموعة من محلات الخياطة الشهيرة على مستوى المعادي وبعض المحلات للخردوات والمكتبات.

والدور الأرضي من المول، هتلقوا فيه فرع لأحد البنوك، ومحلات اتصالات وموبايلات وملابس وأحذية وحلويات وتصوير وعطور وشرابات وصيدلية ومجوهرات ومستحضرات تجميل وملابس حريمي ورجالي وأطفالي ومحلات نظارات وملابس قطنية.

ولما توصلوا الدور الأول فيه محلات ساعات وبيرفيوم وأجهزة كهربائية وشنط وأحذية حريمي واكسسوارات واكسسوار موبايل وأدوات منزلية ومحل حلاقة ودهب صيني وطُرح ومستلزمات محجبات وعبايات وفضيات ومجوهرات ولانجيري، وملابس لكل الأعمار وجلود وجينز.

أما لما تزوروا الدور الثاني فهتلاقوا محلات أحذية وشنط وملابس، وأدوات منزلية وخردوات واكسسوارات حريمي وطرح وخردوات وساعات وسكارف وفضة وبدل ومفروشات وملابس رياضية ومحل شرابات.

وفي الدور الثالث هتلاقوا حاجات حريمي أكتر “شنط – أحذية – مايوهات.. اكسسوار، الخ”، وكمان لعب أطفال وعبايات ومستحضرات تجميل وأدوات منزلية وبدل رجالي.

وأخيرًا في الدور الرابع هتقدروا تزوروا محلات أحذية وملابس وشنط لكل الأعمار واكسسوار الكمبيوتر والذهب الصيني والجلود ومستلزمات الطرح وفساتين السهرة والمكملات الغذائية وكافيه.

تقدروا تعرفوا أكتر عن المول والمحلات والأنشطة من خلال صفحة الفيسبوك من هنا.