The Definitive Guide to Living in the Capital , Cairo , Egypt

بنسوار يا هانم، سعيدة يا بيه، النهارده جايبين لكم مفاجأة مدهشة، أكيد هتعجبكم، بوتيك جديد راقي وجميل فتح في الزمالك، هتلاقوا فيه كل حاجة هتفكركم بالزمن الجميل، من أول استقبال “بهيرة” هانم صاحبة البوتيك (اللي اسمها الحقيقي إيمان) وجوزها “أحمد” بيه، لحد كل قطعة موجودة في المكان.

المكان يا حضرات ويا هوانم فيه قطع اكسسوارات للبيت صحيح جديدة، إلا إن تصميمات كل حاجة مستوحاه من الخمسينيات والسيتينيات، زي التليفون أبو قرص، والتابلوهات، وطقم السفرة، وطقم الشاي، وطقم التوابل بنقوشه الوردية وألوانه المبهجة، والكوسترز السيراميك المطبوع عليها جمل ورسومات من الزمن الجميل.

المكان من أول خطوات فيه هتحس بنسايم الستينيات حواليك في كل حتة، ولأول وهلة هتحس إن وجودك في مكان زي ده هوه اختيار موفق وبديع في الوقت نفسه، لإنك حتى لو مش هتشتري حاجة من الأنتيكات الموجودة، كفاية إنك شوفت وعشت ولو لدقايق في الزمن الجميل.

المكان كمان بيوفر إكسسوارات شخصية للهوانم والآنسات، زي شنطة الماكياج والاكسسورات الجلدية الإيليت، وبراويز ومرايات جديدة بتصميمات الستينيات.

اختيار الإسم ” بهيرة بهير” كان بالصدفة البحتة بعد تفكير عميق من إيمان هانم وجوزها أحمد بيه، واللي وصلوله بعد إيفيه قالته إيمان قدام أحمد فكان القرار إن يكون اسم المكان “بهيرة بهير” ده غير كمان إن الإسم بيوحي بالبنت الأروستقراطية الإليت بنت البشوات، وبدأت الفكرة، من صفحة على الفيس بوك، لبوتيك في الزمالك.

لو حابين توصلوا لبوتيك “بهيرة بهير” ممكن تطلبوا من الشوفير (السواق) يوصل الزمالك وتحديدًا لحد ٣٠ شارع حسن عاصم متفرع من شارع البرازيل، أول ممر يمين بعد مطعم ع الماشي، وفي علامة مميزة “نولا كب كيك” على ناصية الشارع.
لو نويتوا تروحوا، خلوا بالكم إن مواعيد الشغل في البوتيك من الساعة ١٠الصبح  لـ ١٠بالليل، ماعدا يوم الجمعة من ١الضهر لـ ١٠ بالليل، ويوم الأحد أجازة.

وبلغة اليومين دول، ممكن تعرفوا وتشوفوا كل تفاصيل منتجات وعروض “بهيرة بهير” .. من خلال الدخول على صفحتة البوتيك على الفيس بوك من هنا.