Mohamed Talaat
زحمة الشوارع بتزيد، ومعاها أسعار البنزين. ده ساعد على انتشار فكرة استخدام الإسكوتر بين الشباب من الجنسين، كبديل للمواصلات أو شراء العربيات. لأنها أرخص وأسرع في الزحمة. وعلشان كده قولنا نجمعلكم أهم 3 أنواع إسكوتر في مصر، بتفاصيل الموديلات والأسعار.
1- Benelli
النوع ده تصميم إيطالي وصناعة صيني. عيبه إن كل قطع الغيار الأصلية موجودة في التوكيل بس، والتوكيل بتاعهم بعيد في طريق قليوب. لكن بشكل عام الإسكوتر مميز وإمكانيته كويسة وبيتحمل. وعندهم حاليًا 3 موديلات متوافرة في السوق المصري:
كوفي نيرو كلاسيك – 150 CC: موتور 13 حصان، الفرامل باكم، عداد ديجيتال، تانك البنزين 8 لتر. بنظام حرق كاربيراتير، ونظام التبريد ماء. تقدر تمشي بيه على سرعة 80 كم/س لتجنب المخاطر. سعره الرسمي ما بين 25000 لـ 25500 جنيه. شامل الأوراق المرورية.
كوفي نيرو سبورت: موتور 14 حصان، و150 CC، تانك بنزين 9 لتر، كاربيراتير، تبريد ماء وهواء مع بعض، والفرامل باكم هيدروليكية، وسرعته ممكن توصل لـ 100 كم/س. تقدر تروح بيه مشاوير بعيدة، وسعره من 28000 لحد 28500 جنيه.
زافينيرو: ده تقدر تسافر بيه لكن مش مسافات بعيدة، وهتريح كمان في الطريق. موتور 250 CC، 21 حصان، الفرامل 2 باكم خلفي وواحد أمامي، لمبة مور علشان لو فيه مشكلة تنور، الموتور من أعلى التقنيات العالمية في فئته. لو لا قدر الله حصلت حادثة، فيه نظام أمان بيفصل الكهرباء تلقائي. علشان ميحصلش حريق. تانك بنزين 11 لتر إنجيكشن، سرعته القصوى 140 كم/س، نظام تبريد ماء، وسعره في السوق من 38000 لـ 38500 ألف جنيه.
2- SYM
التوكيل الخاص بهم موجود في العبور، ومفيهوش مركز خدمة صيانة. فقط تشتري قطع غيار منه. بتكون متوفرة عند أكتر من تاجر، وأشهرهم زجمار في بولاق أبو العلا. الأنواع عندهم كتيرة، وتبدأ أسعارهم من 18000 ألف جنيه، زي أوربيت 2. وده بيكون 150 CC، وقوة 1.3 حصان، أتوماتيك، تبريد هواء، بنزين كاربيراتير بسعة 5.2 لتر، الفرامل الأمامية باكم، والخلفية سلك، بإضاءة عادية.
Fiddle: دي النسخة الأشهر في الشركة، ومنها Fiddle 2 اللي هو هو نفس أوربيت 2. يختلف إن حجم إطاراته أصغر حاجة بسيطة، وسعره 21200 جنيه.
أما Fiddle 3 فهو 150 CC، بقوة 10.3 حصان، تانك البنزين 6.5 لتر، بنظام الكاربيراتير. فرامل أمامية باكم، والخلفية سلك. ونظام تبريد هواء، سعره الرسمي 25935 جنيه.
فيه نوع مختلف شوية زي Symphony SR ، سعره 25935 جنيه. وSymphony S، سعره 29992 جنيه. الفرق بينهم إن الـ S أكبر من SR. ومواصفاتهم واحدة، 150 CC، 10.3حصان، نظام تبريد هواء، تانك البنزين 5.5 لتر، فرامل باكم أمامي وخلفي.
كمان فيه Symphony ST وده من فئة 170 CC، بقوة 12 حصان، نظام تبريد هواء، تانك بنزين 7.5 لتر، بنظام الكاربيراتير، وفرامل ديسكات باكم، و2 مساعد خلفي. سعره 31000 جنيه.
وفيه Jet 14، بقوة 170 CC، 12 حصان، تانك بنزين 7.5 لتر بحارق وقود كاربيراتير، فرامل أمامية وخلفية ديسك باكم مع نظام CBS. سعره 30870 جنيه. فيه منه نفس المواصفات ولكن البنزين نظام حرقه إنجيكشن، والفرامل بتكون ديسك باكم بنظام CBS مع ABS. وده اسمه Jet 14 I. سعره 34950 جنيه.
أما فئة الـ 200CC فمتوفر منها نوع اسمه Joy Ride، بقوة 15 حصان، نظام التبريد راداتير ماء، وبياخد 7.6 لتر بنزين بنظام انجكشن، فرامل أمامي وخلفي ديسك باكم. سعره 48600 جنيه.
3- Kymco
قدر يكسب جزء كويس من السوق المصري. موديلات الاسكوتر عندهم كانت متعددة، لكن حاليًا معندهمش غير نوع AGILITY CITY. وهو الأكثر مبيعًا. 200 CC، بقوة 11 حصان، بتبريد هواء، تانك 7 لتر، مع فرامل باكم خلفي وأمامي. سعره 31800 جنيه.
كده نكون عرضنا كل المتاح في الفئة المتوسطة، لأفضل أنواع الاسكوتر. وانت عليك تقرر النوع اللي يناسبك.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
