صافية ومبهرة.. 3 أماكن تشوفوا منها السماء بشكل مميز في الويك إند
الأهرامات جبل المقطم خروجة للسماء سماء القاهرة وادي دجلة
Mohamed Talaat
اليومين دول الشمس جميلة في القاهرة، تحسوا أن جسمكم بيتفاعل مع كل لمسة هوا وكل موجة حر وكأن فيه ألفة بين الجو والإنسان، والألفة دي مش هتلاقوها فيكم بس، دي كمان موجودة في المياه والسماء، وده اللي هتقدروا تحسوا بيه لو قررتوا تروحوا مكان تشوفوا منه السماء بشكل واضح بدون أي عوائق، ويا سلام كمان لو رحتوا قبل الغروب، هتشوفوا العجب، واحنا هنقولكم على 3 أماكن مختلفة تشوفوا منها السماء.
وادي دجلة
محمية وادي دجلة اللي في المعادي بتكون مفتوحة وفيها تخييم وتقدروا تروحوا بعربيتكم وتقعدوا بالساعات تبصوا للسماء وأكيد هتلقوا اللي يشد انتباهكم ليها، ولو حظكم حلو هتشوفوا ظاهرة طبيعية مكنتوش تتخيلوا تشوفوها.
جبل المقطم
من أجمل الأماكن اللي تسيبوا نفسكم فيها وتتفرجوا على السماء بشكل كأنكم تشوفوها أول مرة، وروح تانية وحياة تالتة، وهتشوفوا نجوم كتير هناك هتتعجبوا منها، وهناك فيه كافيهات ومطاعم كتير تقدروا تقعدوا في أي واحد فيهم ترتاحوا له.
الأهرامات
مفيش أحلى من أنكم تروحوا تشوفوا السماء من جنب أجدادنا، ورغم أن مواعيد قفل زيارة الأهرامات بيكون بدري إلا أنكم تقدروا تروحوا أي رووف تقعدوا تشربوا وتاكلوا وتشوفوا السماء وتتكلموا مع أجدادنا الفراعنة، ودي قمة المتعة والجمال الروحاني اللي هينقلكم في مود مختلف تمامًا.
