هاتها ماترميهاش: الشباب لما ياخد قرار التغيير
Omar Mossad
لما تحب تحل أي مشكلة مجتمعية اللعب على تغيير وعي الجمهور دايمًا بيكون رهان مضمون النجاح، ده لأنك لو اخترت اللعب على تغيير أي شيء آخر ففي الغالب تغييرك هيكون ظاهري ومؤقت، لكن تغيير الوعي –بالإضافة لكونه مضمون النجاح- بيخليك بشكل تلقائي توجد قاعدة من حملة الرسالة بعدك، ده لأن كل مستفيد هو كان في وقت من الأوقات جزء من المشكلة، وبقى جزء من الحل، فهو مدرك كويس الفرق، وعارف كويس طريقة الحل.
شباب مبادرة “هاتها ماترميهاش” رصدوا أكتر من مشكلة مجتمعية وحبوا يساهموا في الحل، لكنهم بعدوا شوية عن الحلول التقليدية وحاولوا يشوفوا إيه الرابط لكل المشاكل دي؟ أكيد في تفكير ما أو سلوك ما هو اللي مسبب متتابعة المشاكل دي، وبالتالي فإحنا لو عرفناه واشتغلنا عليه يبقى ضمننا أن كل المشاكل دي هتتحل، وبضربة واحدة!
كان الرابط بين مشاكل كتير زي: نقص أكياس الدم للمرضى، وقمامة الشوارع، ونظرة المجتمع لذوي الاحتياجات الخاصة، وبطالة الشباب، رابط فكري بالأساس، نظرة المصريين لكتير جدًا من الحاجات على أنها أشياء واجبة الرمي والتخلص منها، مش على أنها موارد مهدرة ومحتاجة لإعادة التوظيف، بنبص للمخلفات النظرة دي، وكذلك الشباب العاطل وكذلك ذوي الاحتياجات الخاصة، بنشوفهم أورام مجتمعية خبيثة واجب استئصالها وأعضاء فاسدة واجب بترها، لكن مافكرناش أن كل دول هما مجرد مظاهر وأعراض لفكرنا المريض في التعامل معاهم، وأننا لو غيرنا الفكر ده جايز نقدر نحل كل المشاكل دي بخبطة واحدة، وترجع للبيئة نظافتها، وللإنسان قيمته، وإحنا المستفيد الأول.
شباب المبادرة بدءوا يشتغلوا على المفهوم ده من خلال مجموعة أنشطة مكملة لبعضها وتحمل نفس الهدف، زي مثلًا بداية العمل على إعادة تدوير المخلفات، وفي خلال عملية إعادة التدوير يتم توظيف بعض الشباب للقيام بالعملية دي، وأثناء الحملات يتم إشراك بعض ذوي الاحتياجات الخاصة مع مجموعات الشباب علشان يزيلوا الحاجز النفسي ويستغلوا الطاقة البشرية المهدرة، وفي الآخر يتم استقطاع جزء من عوائد عملية إعادة التدوير لصالح توفير أكياس الدم للمرضى وغير المقتدرين، دايرة ذهبية!
يوم الجمعة الجاية (18 نوفمبر) هيكون في فعالية مهمة هينظمها شباب المبادرة، وهي حملة لجمع فوارغ علب المياه الغازية والزجاجات البلاستيكية، الفعالية هتتم في المعادي وتحديدًا من مخيم آدم الكشفي بزهراء المعادي، بداية التجمع هتكون في تمام الثامنة صباحًا وبداية التحرك للشغل هتكون في تمام التاسعة صباحًا، واجب علينا لما نشوف حاجة فعالة ومفيدة وباعثة على الأمل زي كده أننا نشاور عليها ونشجع الجميع على المشاركة فيها، وأنتم كمان عليكم نفس الواجب، المركب واحدة!
تقدروا تعرفوا تفاصيل أكتر عن الفعالية من هنا، وتقدروا كمان تعرفوا أكتر عن المبادرة من خلال صفحة فيسبوك من هنا.
مقترح
الحياة في كايرو
المونوريل والقطار السريع والـLRT.. اعرف الفرق بين وسائل النقل الجديدة في القاهرة
القطار السريع القطار الكهربائي الخفيف LRT +4
فن وثقافة
