The Definitive Guide to Living in the Capital , Cairo , Egypt

كل سنة وأنتم طيبين بمناسبة حلول عيد شم النسيم اللي هيوافق يوم الإثنين 20 أبريل، ونظرًا للأحداث الجارية وانتشار فيروس “كورونا” المستجد، بننصحكم تقعدوا في البيت وماتنزلوش، خاصة أن كافة الأماكن المفتوحة أعلنت الحكومة عن إغلاقها حفاظًا على أرواحكم، وإحنا في كايرو 360 يهمنا صحتكم، وعلشان كده هنقول لكم على 5 طرق طبيعية تلونوا بيها بيض شم النسيم وتستمتعوا بيه وأنتم في البيت.

1- الأحمر والوردي

تقدروا تلونوا بيض شم النسيم بالأحمر والوردي من خلال البنجر، وكل اللي هتعملوه أنكم هتجيبوا حباية بنجر وتقطعوها مربعات صغيرة ومعاها كوبايتين مياه وملعقتين خل، وتحطوهم على النار، وتسيبوهم يغلوا، وبعدين تهدوا النار شوية وتسيبوهم لحد ما البنجر يبقى طري وناعم، وبعدها بتصفوا المياه وتسيبوا البنجر يبرد، وتحطوا البيض المسلوق جواه، أو تستخدموا فرشاة علشان ترسموا على البيض.

2- البنفسجي والأزرق

ممكن تحصلوا على اللونين البنفسجي والأزرق، من الكرنب البنفسجي، وكل اللي عليكم تعملوه أنكم تغسلوا ورق الكرنب وتقطعوه قطع كبيرة، وتحطوه على النار مع كوبايتين مياه ومعلقتين خل، وتسيبوهم يغلوا وبعدها ولمدة 10 دقائق تسيبوهم على نار هادية علشان الكرنب يصفى لونه، وبعدها بيتم تصفية الكرنب، وتنقعوا البيض في مياه الكرنب، وتسيبوه في الثلاجة من الليل للصبح.

3- الأخضر ودرجاته

أما اللون الأخضر فتقدروا تستخدموا السبانخ والبقدونس، وبعد ما تغسلوهم وتقطعوهم انقعوهم في كوبيتين مياه مع معلقتين خل وتسيبوهم على النار لحد ما يغلوا وبعدها تقللوا درجة حرارة البوتاجاز لمدة 10 دقائق تانيين، وبعدها تصفوا المياه وتستخدموها في تلوين البيض.

4- الأصفر والبرتقالي

علشان تقدروا تلونوا البيض بالأصفر استخدموا الكركم، ولو عاوزين اللون البرتقالي يبقى هتزودوا مع الكركم “بنجر”، وده عن طريق استخدام معلقتين كركم كبار يتغلوا في كوبايتين مياه، وشوية خل، وهتغلوهم وتسيبوهم بعد الغليان على نار هادية لمدة 10 دقائق، وبعدها تصفوا المياه، وتستخدموها في تلوين اللون الأصفر، ولو عاوزين اللون البرتقالي هتضيفوا البنجر في المياه علشان يغلي مع الكركم.

5- البني

علشان تلونوا بيض شم النسيم باللون البني هتجيبوا قشر البصل وتغلوه على النار، ومعاه معلقتين خل، وبعد مرحلة الغليان هتسيبوه على نار هادية لمدة 10 دقائق، وبعدها تصفوه وتنقعوا البيض فيه من الليل للصبح علشان تاخدوا درجة اللون البني، ولو عاوزين اللون البني يبقى أغمق هتضيفوا عليه معلقتين بن.