The Definitive Guide to Living in the Capital , Cairo , Egypt

رحلة وتصوير: محمد طلعت

أصبح واضح لكل الناس أن وسائل المواصلات العامة في مصر شهدت تطور كبير، وخاصة داخل القاهرة، واللي أصبحت المواصلات والطرق فيها أسهل بكتير من السنين اللي فاتت، وكل يوم فيه تطور جديد وحقيقي بنشوفه، ومن ضمن الخدمات اللي ظهرت موخرًا في العاصمة المصرية، “التاكسي النهري – نايل تاكسي”، واللي قررنا نستخدمه علشان نعرفكم بشكل عملي على تفاصيل تجربتنا معاه، واللي كانت في مجملها ممتعة لكن مع بعض الملاحظات. جاهزين نبدأ الرحلة؟

التاكسي النهري هو عبارة عن لنش صغير بيتسع لـ 11 فرد، وفيه منه نوع تاني بيتسع لـ 5 أفراد فقط، وهو بيغطي مناطق “نايل سيتي – جاردن سيتي – الزمالك – المنيل – المعادي” كمرحلة أولى، وموجود في كل منطقة منهم مرسى خاص عليه اليافطة الخاصة بيه، وبيقطع المسافة من نايل سيتي لحد المعادي لو مباشرة بدون توقف في 15 أو 20 دقيقة، ولو فيه توقف بتوصل لـ30 دقيقة.

كمان التاكسي بيتحرك حاليًا في موعد واحد الساعة 9 صباحًا من المعادي وعودة الساعة 5 من نايل سيتي مرورًا بخط سيره في المراسي بتاعته، وسعر الفرد بيكون 75 جنيه، للرحلة الواحدة، وكمان تقدروا تطلبوه مخصوص ودي كانت تجربتنا، لما قررنا نجربه من نايل سيتي للمعادي.

طلبنا الرقم المخصص لنايل سيتي وحجزنا التاكسي واللي كان سعره 375 جنيه، لأنه أقل عدد مسموح بيه في الرحلة 5 حتى لو العدد أقل بيتدفع حق الـ5 ركاب، وطبعًا هو شيء مش لطيف وتكلفة عالية لو هتستخدموه كوسيلة مواصلات، لكن لو مجرد رحلة ترفيهية فالأمر يستحق، لأن سعر المراكب الخاصة بيكون أعلى وكمان هي مافيهاش نفس مستوى الأمان زي “نايل تاكسي”.

ورقم طلب التاكسي النهري هو: 01280118888

في بداية طلب الرحلة واجهتنا مشكلة نتمنى أنهم يحلوها بسرعة، أننا طلبنا التاكسي عند مرسى البنك الأهلي ولكن طلع أن الرصيف بتاعهم لسه مش جاهز وده خلانا نضطر نمشي 1.3 كيلو لحد أبراج نايل سيتي علشان نركب من المرسى الجاهز.

بعد ما وصلنا مكان المرسى لقينا 3 تاكسي نهري، 2 صغيرين وواحد كبير اللي هو استخدمناه للتحرك ومش عارفين الحقيقة سبب اختيار الكبير ده هل لأنه عليه الدور ولا علشان دافعين حق 5 ولكن ما علينا.

بمجرد الخروج من المرسى بالتاكسي النهري والتحرك وسط النيل حسينا إننا سافرنا لعالم من السحر والخيال، وكانت تجربة ممتعة وجميلة، وشوفنا من حوالينا الزمالك وقصر عائشة فهمي، وماسبيرو ومبنى وزارة الخارجية وبرج القاهرة وغيرهم، وعدينا على كوبري قصر النيل وكوبري عباس وغيرهم من الأماكن لحد ما وصلنا المعادي ونزلنا عند مدخل المعادي 2.

التجربة في مجملها كانت ممتعة جدًا، خاصة ان الجو كان جميل ولكن..، أولًا كان خطأ مننا نختار التوقيت بعد غروب الشمس لأننا كنا هنستمتع أكتر في وقت الغروب وما قبله وهنشوف القاهرة ونيلها بشكل مختلف، علشان كده بننصحكم تستخدموه بالنهار.

للأسف تاني مشكلة كانت أن الماتور بتاع التاكسي النهري صوته عالي جدًا وده يدل على أنه مش حديث لأنه مافيهوش كاتم صوت، والحاجة التالتة اللي ضايقتنا “السرعة”، التاكسي سريع جدًا لدرجة أننا كنا في أوقات بنقلق وقلبنا بيتقبض من سرعته.

تقدروا تعرفوا أكتر عن التاكسي النهري ومواعيده من خلال صفحة الفيسبوك من هنا.