The Definitive Guide to Living in the Capital , Cairo , Egypt

بنحس دايمًا إن من جمال الورد إنه بيغني، أو بيلمس روحنا، أو حتى بيخلينا في مود أحسن. علشان كده، دايمًا الورد والزراعة ليهم سحر خاص مالهوش وصف كامل، وكل إنسان ليه وصفه الخاص حسب نوع الورد أو الزرع اللي بيتسحر بيه. وبما إننا في الربيع، وده ميعاد أهم معرض في الوطن العربي، هنقولكم على التقاصيل الكاملة لزيارة معرض زهور الربيع 2025 في دورته الـ92.

قبل ما ندخل في التفاصيل، خلينا نقولكم شوية نصايح مهمة بناءً على زيارتنا للمعرض: أولًا، ألبسوا صيفي ويفضل ملابس قطن وواسعة، وخلو معاكم صن بلوك، وسبراي للجسم، وماتنسوش المياه والعصاير، ولو أنتم من أصحاب الأمراض المزمنة زي الضغط أو السكر، خلو معاكم أكلكم وأدويتكم، وحدّدوا إنتوا رايحين ليه ومحتاجين تشترو إيه، علشان ما تتعبوش وتتوهوش.

مواعيد وموقع المعرض:

معرض زهور الربيع 2025 مستمر لمدة شهر، لحد 19 مايو، في المتحف الزراعي بالدقي، وسعر تذكرة الدخول: 10 جنيه، ورسم دخول السيارة: 25 جنيه.

إزاي تروح المعرض؟

أقرب محطة مترو للمعرض هي الدقي، أو ممكن تركب أي مواصلة بتعدي من شارع التحرير أو ميدان الدقي، وتنزل وتتمشى 9 دقايق لحد المتحف. كمان ممكن تركب مواصلة رايحة شارع البطل أحمد عبد العزيز وتطلب منه ينزلك عند المتحف الزراعي، ولو رايح بسيارتك، دي أنسب وسيلة لو ناوي تشتري حاجات كتير.

أهم المنتجات الموجودة في معرض زهور الربيع 2025:

فيه مشاركات من جمعيات وهيئات مختلفة، ومن المنتجات اللي لقيناها: فستوكا، دوار الشمس، إيكروما حلق الأميرة، نعناع، بالمباجو أحمر، روح النعناع، مزحريت، تومية، تراث أجدادنا، زناريا مفرد، لمون جراسي، ورد بلدي، ريحان، فل، ياسمين، ارجانو، تمبارجيا (العيون السوداء)، بلانشون، فل سعودي، ريحان تدمس، كالوينا، زعتر بلدي، جاطو سنتيا، سلانيم قائم، وينكا، ايروبس، دخلة، مونفتيكا، الالترا، صبار مكحلة، جلد القمر، ودن الفيل، فل بلدي مجوز، الشيح، صبار إيفوربيا، الزناريا، صبار عرف الديك، قرنفل، صباريو، وراسينا ذرة، فل مفرد، عنكبوت، روزماري، توكوماريا، صبار جلد النمر، الجارونيا، جهنمية، بردقوش، صبار مبرد، لافندر، المندلية، اديكا، صبار قطر الندى، جنكاذيا، ياسمين هندي، العطر، مسك الليل، ورد بونبون، جازانيا فراولة.

الأسعار: من 5 لـ10 جنيه.

شتلات الأشجار المثمرة:

الأنواع: خوخ، مشمش، كيموكوات، تفاح أمريكي، برقوق، تفاح بلدي، تفاح مقزم، تين، جريت فروت، كاكا، مانجو بأنواع، ليمون، يوسفي، بشملة.

الأسعار: بتبدأ من 1000 جنيه وتوصل لـ7000 جنيه حسب الحجم وفترة الإنتاج (من سنة لـ3 سنوات).

شتلات النخيل للبلح البارحي: بتبدأ من 3500 جنيه وبتنتج خلال سنتين.

نباتات الزينة:

الأنواع: Ds، بامبو مائي، أكاليفيا، روبينول، أريكا خضراء، مثلثة، دانوس، رابس.

الأسعار: من 1000 لـ6000 جنيه.

أدوات الزراعة والديكور:

قصاري: من 5 جنيه

طمي: من 20 جنيه (لكيس 2 كيلو)

معدات حدائق

فخار بالكيلو: 175 جنيه

ديكورات خشب: من 50 جنيه

ورد صناعي: من 5 جنيه

والفنان التشكيلي “محمد إمام”: بيقدم ديكورات خشبية معاد تدويرها عليها عصافير، سعر القطعة: 100 جنيه.

أثاث ومنتجات خشبية:

أطقم كراسي وأنتريهات: من 700 جنيه.

فخار ديكوري: من 60 جنيه.

كتب الزراعة:

متاحة في قسم الإدارة العامة للثقافة الزراعية، والأسعار بتبدأ من 3 لـ25 جنيه.

مبادرة “أزرع شجرة”:

اتعرفوا على خطوات الزراعة وشراء الأدوات والمنتجات اللازمة.

منتجات هاند ميد:

خيش وخيوط وقماش: من 40 جنيه.

مكرمية وكروشيه وتريكو: من 200 جنيه.

وفيه كمان جناح وزارة الشباب والرياضة، واللي بيقدم منتجات من عارضات بيشتغلوا حاجات فريدة.

وأخيرًا..

نتمنى زيارتكم لمعرض زهور الربيع 2025 تكون مميزة وتلاقوا فيها كل اللي بتحبوه، وكل ربيع وأنتم طيبين يا أهل القاهرة الطيبين!