The Definitive Guide to Living in the Capital , Cairo , Egypt

الصورة الرئيسية: Arno Smit

بتحب الزرع؟ بتتبسط من ريحة الورد وشكل الخضرة؟ بتحلم ترجع من شغلك تلاقي زرع جميل مستنيك في بلكونة بيتك؟ معرض زهور الربيع راجع من تاني في دورته الـ92، وجايب معاه كل حاجة ممكن تتخيلها من زهور ونباتات وشجر وديكورات، لحد المنتجات الطبيعية والهاند ميد… وكمان مفاجآت أول مرة تحصل!

في قلب المتحف الزراعي بالدقي، هتدخل مكان كأنك في جنة خضرا، تتفرج، تشتري، تتعلم، وتتبسط.

معرض زهور الربيع من أقدم المعارض في مصر والشرق الأوسط، وأول نسخة منه كانت سنة 1934، وكل سنة بيضم مجموعة كبيرة من العارضين للزهور والنباتات والأدوات الخاصة بالزراعة. وكمان هتلاقوا قسم للحيوانات الأليفة والعسل ومنتجات الهاند ميد.

كمان هتلاقوا في المعرض مجموعة من العارضين المتخصصين في اللاند سكيب والديكورات المنزلية من منتجات زراعية وشلالات وحاجات تانية كتير، ومعاهم كمان متخصصين في أنظمة الري والزراعة سواء للمنازل أو للحدايق الكبيرة.

والمعرض كمان بيقدم، زي كل سنة، ورش عمل ودورات تثقيفية متخصصة في النباتات وزراعتها وطرق الحفاظ عليها. والسنة دي، لأول مرة، هتشارك منظمة الأغذية والزراعة بالأمم المتحدة، والمعروفة باسم “الفاو”، في المعرض، وكمان اتوجهت دعوات للسفارات العربية والأجنبية علشان يشاركوا.

معرض زهور الربيع هينطلق يوم 12 أبريل وهيستمر لمدة شهر، وهيكون جوا المتحف الزراعي في الدقي. سعر تذكرة الدخول 10 جنيهات، ومسموح بدخول العربيات بتذكرة منفصلة. وفي كمان ركنة متوفرة برا المعرض. تقدروا تروحوا له بسهولة بالمترو، وأقرب محطة هي “الدقي”، أو أي مواصلة بتمر بشارع البطل أحمد عبد العزيز أو شارع التحرير.