The Definitive Guide to Living in the Capital , Cairo , Egypt

يمنى أحمد

الصور: قصر هوج بالزمالك، مسجد أحمد بن طولون، قصر عائشة فهمي

سلام! مفيش أحلى من الكلمة دي، تقدر تقولها في كل وقت ومع أي حد حتى لو متضايق منه، كلمة بتعلمك إن قلبك نضيف وبتفضل تدور على المعنى الفعلي ليها لحد آخر لحظة في حياتك، يمكن علشان كده قررت الأمم المتحدة إنها تعمل يوم للسلام العالمي علشان تنشر السلام بين الدول والشعوب والحكومات، وده بيكون في شهر سبتمبر من كل عام..

احنا هنا في كايرو 360 قررنا نوديكم عن طريق السطور دي لأماكن في القاهرة هتلاقوا السلام فيها في أبسط وأجمل صوره، هتلاقوه في المساجد الدينية، والقصور التاريخية، وشوارع الزمالك الخلفية! يلا بينا نبدأ الرحلة.. رحلة السلام!

مساجد القاهرة القديمة

هتلاقي السلام في كل المساجد اللي في الدنيا، علشان مافيش أحسن من دخول بيت ربنا وإحساسك بالونس فيه، لكن المختلف في مساجد القاهرة إنها هتدخلك في حالة مليئة بالدهشة، إن المساجد دي مر على وجودها مئات السنين ولسه ليها الرونق بتاعها، هيغمرك السلام لما تدخل الجامع الأزهر الشريف اللي بناه جوهر الصقلي لما جه مصر، ومش هتعرف تخرج منه غير بحالة طمئنة وقادر تواجه تفاصيل جديدة في حياتك اليومية المرهقة.

لما تدخل مسجد أحمد بن طولون هتقرر ترمي همومك كلها هناك على عتبة الباب، هتلاقي مساحة مناسبة جدًا إنك تعيد تفكير في مشاكلك وتحلها بطريقة صح، تفاصيل المسجد نفسه هتنسيك إحساس التشتت اللي ملازمك في تفكيرك بشكل عام، وهتشوف بعينك البسيطة إزاي المسجد ده يقدر يغير فيك كتير، ويغيرك للأحسن طبعًا.

أما عن مسجد محمد علي اللي موجود بقلعة صلاح الدين الأيوبي فأنت هنا واخد ميعاد مع سلام من نوع خاص، سلام ظاهر في تفاصيل المبنى العتيق، الزخارف اللي هناك، ومخطوطات الجدران وأبيات الشعر اللي بتدخلك في حالة من المتعة، تخيلك لتفاصيل بناء المسجد وتعبد اللي قبلك فيه، هتخليك تفهم نفسك من زوايا كتير، خاصة الماضي بتاعك لو كنت شايفه وحش ومتشوه، المسجد ده ممكن يخليك تحبه وتحب نفسك وياه.

قصور القاهرة التاريخية

كل القصور اللي في القاهرة حصلت فيها خلافات بلا شك، وده لأن كان فيها بشر مهما كانت درجة قربهم إلا إنهم هيكونوا في وقت مش متفاهمين، بس إحنا لينا الظاهر واللي وصلت ليه حال القصور دي دلوقتي.. بقى بيعمها السلام ويغمرها السكون، وبالتالي وأنت هناك هتقدر تحل خلافاتك مع نفسك وتنعم ببعض السلام ولو ليوم واحد!

قصر محمد علي بالمنيل مثلًا، مش هتلاقي فيه دوشة كتيرة، مكان هادي موجود على النيل، كل جدرانه بتنطق بالحيوية، حكاياته كتير هتقدر تقرأها من المرويات على أثاثه اللي مر عليه سنين بس لسه محتفظ بجودته ورونقه، وأوعدك هتكون في حالة جميلة هتحب فيها البلد دي أكتر.

بس قصر عائشة فهمي بالزمالك له حياة تانية، يعني جرب تخلع مشاكلك على باب القصر وادخل، جرب القعدة على النيل مع مشروب في البهو بتاعه، وعيش حالة الرومانسية واستمتع بالأحلام اللي هتزورك، نسمة هوا النيل مع نعومة جدرانه اللي هتلمسها هناك هتحولك لإنسان لين، قادر يفكر في كل حاجة بكل بساطة!

بالنسبة لقصر البارون إمبان اللي في حي مصر الجديدة، فده من يومه وهو بيدخل السلام على الحي بتاعه، ليه؟ علشان ده أول قصر يكون في هليوبوليس أصلًا، ولكن الهدوء اللي فيه هيعوضك عن زحمة القاهرة ودوشتها الغريبة، وهتحس بالونس والطمأنينة وأنت هناك.

شوارع الزمالك الخلفية

ودي بقى أكتر مكان هتشوف السلام فيه بقلبك، عينك مش هقدر تغفل التفاصيل الهادية وسكون الشوارع، وفكرة إنك في جزيرة وسط المية، وحواليك أصوات عصافير ونسمة هوا مختلفة ده هيشيل من دماغك كل الأفكار المزعجة، ويحطك في مواجهة حقيقة مع نفسك.

السلام مش بس في الأماكن دي، هتلاقيه في وشوش الناس، وفي بعض الجداريات، هتلاقيه في ضحكات الأطفال وابتسامات الشوارع، هتلاقيه! نصيحتنا ليك إنك تدور عليه.. بس تأكد إنك هتشوفه في المكان المناسب، والوقت المناسب جدًا.