The Definitive Guide to Living in the Capital , Cairo , Egypt

أغلبية خروجات المصريين بتنحصر في أماكن أكل زي المطاعم والكافيهات، وبالتالي مافيش أي أنشطة بتتعمل وبعدين نرجع نشتكي أننا كسلانين وجسمنا واجعنا ومافيش أي تجديد للطاقة، ولما الواحد بيلاقى أماكن فيها أنشطة -خاصة لو أسرة كمان عندها أطفال- الحماس بيزيد والرغبة في التجريب والاستكشاف بيحصل لها Activation، وده اللي حصل لنا لما عرفنا أن فيه مكان اسمه مزرعة العجواني – Agwani Farm.

مزرعة العجواني مكان مناسب للأطفال والكبار، مزرعة كبيرة فيها أنواع حيوانات كتيرة زي الحصان والحمار والقرد وبط وحمام وبغبغان وعصافير وأرنب وسلحفاة ممكن الأطفال تلعب معاهم وتأكلهم كمان، وفيه كذا مكان الأطفال بتعمل فيه أنشطة زي: الطباعة بالأستنسل على شنطة وتلوين على الجبس وعمل تشكيل بالطين الأسواني، وبعدين بيقعدوا مع الفلاحة بتديهم عجينة علشان يخبزوا عيش وياكلوه، صاحبة المكان هي سلوى العجواني مهذبة جدًا وروحها حلوة ومبتسمة دايمًا، لازم تتصل بالمكان قبل ما تروح علشان تحجز، لأن وارد ما يكونوش شغالين فبيشغلوا المكان مخصوص علشانك، وكمان فيه للأطفال مراجيح. كلمهم على: 01227679922. 

المزرعة موجودة فى أول طريق مصر إسكندرية الصحراوي قريب من فندق الواحة (وأمام مدرسة فيكتوريا كولدج)، لو مشيت على لوكيشن Google Maps اللي على صفحتهم على فيسبوك هتوصل مضبوط، لو أنت جاي من اتجاه الشيخ زايد أو أكتوبر هتلاقيه على الناحية التانية ولازم هتاخد U Turn، لكن للأسف أقرب ملف في شارع الهرم ولازم هتدخل هناك علشان تلف كأنك رايح ميدان الرماية (المزرعة بعد الميدان بنصف كيلو)، ولو أنت جاي من الدائري من المعادي أو مصر الجديدة هيكون على صفك فمافيش مشكلة، الدخلة مش عليها يافطة بس اللوكيشن مضبوط، هي مش على الطريق، هتفضل ماشي لجوه شوية لحد ما توصل عند الباب.

لما رحنا كان معانا أطفال اتبسطوا جدًا مع الحيوانات، بيكون معاك عم منصور هو المسئول عن الحيوانات وبيساعد الأطفال وبيعرف يتعامل معاهم ومبتسم دايمًا، بيديهم الأكل وبيعلمهم إزاي يأكلوهم، اتبسطنا جدًا مع المعيز ساندي وماندي ورؤوف، والحصان سمر وغيرها من الحيوانات، المكان فيه موسيقى شغالة دايمًا والبط هتلاقيه ماشي جنبك رايح للبحيرة وشكله يجنن.

المكان بيستقبل العائلات والمدارس، رسم الدخول لليوم كله معقول بدرجة كبيرة، وشامل بالنسبة للكبار فطير مشلتت وعسل وجبنة ومش، وبالنسبة للأطفال شامل الأنشطة اللى هيعملوها داخل المكان اللي اتكلمنا عنها فوق وبياخدوا كل حاجة عملوها بأيديهم وهما ماشيين، ماعدا لو هينطوا في الترامبولين أو وهيختاروا ركوب الحصان اللي هيلف بهم في المكان، ولو الكبار حبوا يعملوا أنشطة مع الأطفال كل نشاط له رسوم رمزية، كمان لو عجبك الفطير وعاوز تشتري منهم زيادة: هتقدر تشتري فطير وممكن تشتري عيش كمان، وممكن تحجز المكان لو عاوز تعمل عيد ميلاد ابنك أو فرح.

المكان نظيف جدًا وآمن وكل اللى شغالين هناك مبتسمين دايمًا، المكان شغال من الساعة 10 الصبح لحد 3 الظهر فقط، ممكن تروح في أي وقت خلال المدة دي وتبدأ باللى نفسك فيه، بس نصيحتنا روحوا من بدري علشان تستمتعوا بقدر الإمكان لأن الأنشطة والمكان ممتعين لك ولأولادك.