لو بتسوق في المطرة يبقى الـ7 نصايح دول أكيد هيفيدوك
Omar Abd-elmaqsoud
زي ما الشتاء ليه أصوله وطقوسه الخاصة في أسلوب حياتنا، واللي عادةً بتبتدي باللبس التقيل والمشروبات السخنة بكثافة وأدوية البرد والأنفلونزا. كمان الشتاء ليه طقوسه الخاصة في السواقه وركوب العربيات. لإن زي ما الجو والبرد بيأثروا عليك، كمان بيأثروا على عربيتك وسواقتك. بشكل يمكن مش هتحسه غير لو اتعرضت لمواقف مش ظريفه.
وعلشان نتجنب المواقف دي، حاولنا نجمعلكم أهم 7 نصايح لسواقة أكثر أمان، في حالة وجود أمطار أو شبورة. حسب ما نشرها موقع “المصري اليوم”:
1- حاول دايمًا تشيك على عربيتك وتسخنها قبل ما تتحرك. وإتأكد من ضغط الهواء في الكواتشات. لإن ضغط الصيف غير ضغط الشتاء.
2- حاول تمشي بسرعة مناسبة للمسافة اللي باينه قدام عينيك، واللي تخليك تقف بشكل آمن لو اضطريت لده.
3- حاول تضاعف المسافة بينك وبين العربية اللي قدامك. اللي هي أصلاً اسمها “مسافة الأمان”.
4- خلي فيه منفذ تهوية علطول في العربية حتى لو بسيط، لإن ده هيمنع تكوين الشبورة جوه العربية. واللي هتخلي الرؤية عندك مش واضحة مع الوقت.
5- زود تركيزك عن الطبيعي وانت سايق في المطرة أو الشبورة. يعني لو مش نايم كويس بلاش تسوق، ولو مش مضطر أجل مشاويرك لوقت تاني.
6- في حالة الشبورة، نور كل أنوار العربية بس على الهادي مش العالي. وخليك مشغل الفلاش (الانتظار)، أو فوانيس الشبورة لو عندك علطول وانت سايق.
7- وأخيراً.. حاول تمشي في نص الطريق مع الخطوط البيضه اللي في النص. وبلاش تغير سرعتك في حالة إن الشبورة راحت فجأة، لإن الشبورة في الغالب بتكون متقطعة.
أكيد في نصايح أكتر، وكل واحد فينا عارف طريقه وعارف عربيته، لكن كلنا بنتفق إن السلامة والأمان ليهم قواعد، لو التزمنا بيها كلنا أكيد هنكون بخير.
مقترح
الحياة في كايرو
المونوريل والقطار السريع والـLRT.. اعرف الفرق بين وسائل النقل الجديدة في القاهرة
القطار السريع القطار الكهربائي الخفيف LRT +4
فن وثقافة
