The Definitive Guide to Living in the Capital , Cairo , Egypt

منطقة الدرب الأحمر مليانة كنوز مخفية ماحدش يعرف عنها حاجة، بدأنا في كايرو 360 رحلة اكتشاف للأماكن دي وتوثيقها بالصور، ونفسنا إن الأماكن دي تتحول زي شارع المعز لأنها مليانة كنوز تاريخية مهمة. لكن عاوزة اهتمام.

المكان اللي إخترناه النهارده هو مدرسة وسبيل ومسجد “خاير بك” أول سلطان عثماني، واللي كان مملوك زمان وتداولت الأقاويل أنه ساعد العثمانيين في الوصول للحكم وعلشان كده كانت الجايزة بتاعته أنه يكون أول والي لمصر، وفي أخر أيامه عمل المدرسة والجامع والسبيل جنب القصر بتاعه علشان يكفر عن أخطائه لأن الشعب ما كنش بيحبه.

في شارع باب الوزير، ولما توصل نصه تقريبًا جنب المسجد الأزرق هتلاقي بوابة قديمة جنبها سبيل بتشوف اللي باقي منه حفرة كانت بتتملي مياه، كان جنبها كوبايات مزخرفة فضة اتسرقت طبعًا من زمان، وكانت الجمال بيتجي محملة المياه وتتصب من فوق وتنزل في الحفرة أو المكان الفاضي ده.

وأنت داخل من البوابة، هنلاقي على يمينك وشمالك مربع كبير من الطراز المملوكي، وده كان المكان اللي بيقعد فيه المساكين زمان علشان مايقعدوش على نفس المستوى اللي الناس بتقلع وتلبس فيه جزمهم تكريمًا ليهم. لأن فكرة المساكين اللي بيقعدوا على باب الجامع كانت منتشرة من زمان بس الظاهر أنهم كانوا قليلين زمان فحبوا يكرموهم بالطريقة دي.

بعد الدخول من بوابة السبيل بنمشي في ممر طويل ونخرج منه على مكان واسع نقدر نشوف منه بوضوح قبة مسجد خاير بك، واللي من أجمل القبب اللي ممكن تشوفها، وبنلاحظ اختلاف المكان عن الصور اللي كانت موجودة في موسوعة د. سعاد محمد “مساجد مصر وأولياؤها الصالحون”، خصوصًا لأن المسجد اترمم مرتين أخر مرة كانت في سنة 2007 على إيد مؤسسة أغاخان، بنطلع سلم صغير ويفتح لنا حارس المكان الباب، علشان ندخل مكان سحري ماحدش يتصور إن الجمال ده موجود ومقفول عليه كنوع من أنواع الحفظ لتراث يقدر بالملايين.

بعد المسجد فيه القصر القديم لخاير بك، واللي فاضل منه جدران بس، والقبو اللي يصلح يتعمل فيه كثير من الأحداث المميزة لأنه بالرغم أنه مافيهوش إلا حيطان قديمة إلا أنه قيمة تاريخية فريدة. كمان فيه على جنب المكان اللي كانوا بيربطوا فيه الماشية ومكان على الشمال فيه القبة القديمة للضريح ومزروع جنبهم بعض الزرع الصغير اللي مدي بهجة للمكان الواسع.

مجموعة خاير بك كنز مدفون مش معروف، لتاريخ شخص ممكن مايكونش ماضيه أفضل ماضي بس على الأقل ساب تحفة معمارية مميزة للي بعده.