كل اللي محتاج تعرفه عن جمارك الموبايلات: أسئلة وإجابات ونصائح مهمة
إعفاء الهاتف الشخصي الجمارك في مصر تطبيق تليفوني جمارك الموبايلات رسوم الموبايلات صناعة الهواتف المحلية موبايلات مستوردة
Cairo 360
الصورة الرئيسية: Thom Bradley
مع بداية السنة الجديدة، وزارة المالية بالتعاون مع الجهاز القومي لتنظيم الاتصالات بدأت في تفعيل تحصيل الجمارك على الموبايلات المستوردة. القرار ده هدفه مواجهة التهرب الجمركي وحماية الصناعة المحلية اللي بتعاني بسبب انتشار الموبايلات المهربة.
خلينا نشرح التفاصيل أكتر، ونرد على كل الأسئلة اللي ممكن تخطر على بالك بخصوص القرار ده:
- هل في رسوم جديدة على الموبايلات المستوردة؟
لا، مافيش رسوم جديدة. الرسوم الجمركية كانت مطبقة من زمان بنسبة 38.5% من قيمة الموبايل، لكن المشكلة كانت إن أغلب الموبايلات بتيجي مهربة، وده بيضيع على الدولة حوالي 80% من الرسوم المستحقة. علشان كده، الدولة قررت تفعيل تحصيل الرسوم بشكل أكثر جدية.
- إيه الموبايلات اللي معفاة من الرسوم؟
الموبايل الشخصي اللي بتستخدمه هو الوحيد اللي معفي من الجمارك ولك هاتف تاني كمان مستورد. أي موبايل غيرهم مستورد، سواء للهدايا أو البيع، هيتفرض عليه رسوم.
- القرار ده بأثر رجعي؟
لا. الرسوم دي هتتطبق على الموبايلات الجديدة اللي هتدخل مصر بداية من 2025. أما الموبايلات اللي تم شراؤها وتفعيلها قبل التاريخ ده، فهي معفاة من القرار.
- إزاي تعرف قيمة الرسوم وتسددها؟
بسهولة جدًا! الدولة وفرت تطبيق إلكتروني اسمه “تليفوني“، تقدر من خلاله تسجل موبايلك، تعرف قيمة الرسوم، وتدفعها أونلاين. كمان عندك مهلة 3 شهور لتسوية الوضع. حمل تطبيق “تليفوني” للأندرويد من هنا، وللآيفون من هنا.
- هل القرار ده بيشمل أجهزة تانية زي الساعات الذكية أو اللابتوب؟
لا، القرار بيخص الموبايلات بس. الساعات الذكية، اللابتوب، وسماعات الأذن مش مشمولين في الرسوم الجمركية.
- إعفاء الموبايل الشخصي ممكن يتسبب في تلاعب؟
علشان الدولة تمنع أي تلاعب، الموبايل المعفي هيتراقب لفترة 3 شهور، وده نفس النظام اللي تم تطبيقه مع سيارات المعاقين سابقًا.
- إيه الهدف من القرار؟
الدولة بتسعى لتحقيق أكتر من هدف:
- ضبط السوق، ومنع الممارسات غير القانونية.
- تشجيع الصناعة المحلية، وتوفير موبايلات بجودة عالية وأسعار تنافسية.
- دعم الاقتصاد من خلال زيادة العوائد الجمركية، وضمان المنافسة العادلة للمستثمرين والمستهلكين.
وأخيرًا..
القرار ده خطوة لتنظيم سوق الموبايلات في مصر، وتشجيع التصنيع المحلي. لو معاك موبايل مستورد، استخدم تطبيق “تليفوني” علشان تسجل وتسدد الرسوم بسهولة.
مقترح
معالم وسياحة
الهروب إلى سيناء.. دليلك لقضاء أجازة صيف ماتتنسيش في العريش!
السياحة في سيناء العريش +8
مطاعم
