علشان ما حدش يضحك عليك.. 10 نصائح لاختيار أضحية العيد بطريقة صح
أسعار الأضحية أضحية العيد ازاي تشتري خروف شراء خروف عيد الأضحى لحمة العيد نصائح لشراء الأضحية
Mohamed Talaat
هانت خلاص، وكلها أيام وندخل في أجواء عيد الأضحى المبارك، وكل سنة وأنتم طيبين، وطبعًا كتير مننا بيضحوا في العيد، سواء بخروف أو عجل، ولكن مش كلنا بنعرف نشتري، علشان كده كايرو 360 قررت أنها تساعدكم وتقول لكم على 10 نصائح تاخدوا بالكم منها قبل ما تشتروا أضحية العيد من الأسواق والمزارع المنتشرة في القاهرة.
1 – لازم تشتري من تاجر سمعته دهب، علشان السمعة مش سهلة في سوق “المواشي”.
2- لو الأضحية منفوخ من تحت يبقى شارب مياه كتير، فبلاش توزنه وتشتريه لأنه “تقيل” على الفاضي.
3 – ماتشتريش غير الأضحية اللي شقية وبتتنطط، اللي كسلانة ملناش دعوة بيها.
4- تبص على “المناخير” علشان لو فيه رشح يبقى “إجري يا مجدي” علشان الأضحية مريضة.
5- تركز في الجلد كويس وتدور لو فيه بقع أو طفح جلدي ماتشتريش.
6- ما تشتريش الأضحية اللي فيها فراغات في الجلد.
7- ماتشتريش أضحية تكون عينيها حمراء، وخللي بالك من البروزيلين (قطرة للعين).
8- لو لقيت الأضحية همدانة ومعضمة بلاش منها.
9 – لازم تنقي أضحية لحمها كتير ودا تحسه بلمس منطقة الضهر.
10 – أوعى الميزان يغشك، واتأكد أن وضعه صحيح ومش ملعوب فيه.
وعيد سعيد يا أهل القاهرة!
