The Definitive Guide to Living in the Capital , Cairo , Egypt

زي كل سنة مع قرب حلول شهر رمضان المبارك بتتجه الدولة لدعم المواطن وبتوفر له كافة الاحتياجات من السلع الأساسية من خلال معارض بتكون منتشرة في كل مكان، والسنة دي مع ارتفاع الأسعار الرهيب هيكون للمعارض دي دور كبير في حل أزمة التسعير اللي كلنا متأثرين بيها بسبب جشع التجار اللي وصل عندهم سعر كيلو السكر بـ50 و60 جنيه، وخلال السطور اللي جاية هنقولكم على أماكن انتشار معرض أهلًا رمضان 2024 بالقاهرة والجيزة.

وزارة التموين المصرية قالت أن معارض أهلًا رمضان هتستمر حتى 15 مارس 2024، وأن أسعار السلع داخل المعارض هتكون في متناول المواطن البسيط وهيكون سعر  كيلو السكر المعبأ بداية من 27 جنيه، وكيلو الأرز من 20 جنيه وبحد أقصى، 25 جنيه، وعلبة الجبنة تبدأ من 56 جنيه، وكيلو المكرونة من 20 جنيه، وزيت القلية يبدأ من 40 جنيه، وزيت شطارة لتر 90 جنيه، وزيت عباد الشمس 3 لتر يبدأ من 270 جنيه، وسعر زيت ثمرات 85 جنيه، ده غير لتر زيت مقلية اللي سعره هيكون 58 جنيه.

أما أماكن تواجد معارض أهلًا رمضان 2024 فهي هتكون في “منطقة أثر النبي ومنطقة المنيل وميدان الباشا في حي مصر القديمة، حي البساتين بجوار شركة الكهرباء، منطقة المنيل بحي مصر القديمة، المعصرة والتبين بحلوان، زهراء المعادي، عرب المعادي، ميدان الحرية المعادي، حي الموسكي، شارع حسن مأمون مدينة نصر، شارع 9 المقطم.

أما الأماكن المحددة لمعارض أهلًا رمضان 2024 داخل نطاق محافظة الجيزة فهي موجودة في شارع البوهي وشارع الوحدة وشارع طلعت حرب بإمبابة، ومنفذ أمام قسم شرطة الوراق، ومنفذ شارع محجوب ثابت وشارع الفالوجا وشارع أبو المعاطي بالعجوزة، وشارع البطل أحمد عبد العزيز وشارع الحوفي بمدينة الأوقاف، وشارع جامعة الدول العربية وشارع الحجاز والرشيد بأحمد عرابي، وشارع المشروع بميت عقبة، وكفر المنفى بجوار الجامع الأصفر وشارع الصفا والمروة أمام المدرسة في الهرم.

وكل سنة وكل قراء موقعنا الأعزاء بخير ودايمًا نكون عند حسن ظنكم كدليلكم الأول داخل العاصمة.