The Definitive Guide to Living in the Capital , Cairo , Egypt

النهارده الخميس، يعني بداية الويك إند، يعني العيد القومي الأسبوعي لكل عشاق الخروج والفسح واكتشاف أماكن حلوة. يوم كده له فرحة خاصة، ولا فرحة اللي خلص امتحاناته ونجح بامتياز. الواحد بيفكر ويخطط للويك إند طول الأسبوع، وبعد ما يعدي يبدأ يفكر في اللي بعده.

نبدأ بالنهارده الخميس، وحفلة لفرقة الطنبورة البورسعيدية على مسرح الضمة. هاتقدم فيها أجمل الأغاني على ألحان السمسمية. سعر التذكرة: 30 جنيه. وفي مركز الربع، الشيخ إيهاب يونس هايتحفنا بمجموعة من الأناشيد الدينية الصوفية. سعر التذكرة: 35 جنيه. ييلو أمبريلا في المعادي، بتستضيف النهارده حفلة غنائية للفنانة هانيا فانسا. سعر التذكرة: 40 جنيه. أما رووم في الزمالك، فبيكون فيها حفلة موسيقية لعازف الجيتار الإيطالي “موريتزو أباتي”. وسعر التذكرة: 50 جنيه.

ندخل على بكرة، الجمعة، بحفلة إنشاد ديني في علبة ألوان. الحفلة هيحييها الفنان وائل الفاشني. وسعر التذكرة: 60 جنيه. وحفلة إنشاد تانية في رووم آرت سبيس، بس بيقدمها الشيخ زين محمود وفرقته. وسعر التذكرة: 50 جنيه. أما بلكون هليوبوليس في مصر الجديدة، فبيعرض الفيلم الإيطالي “The Best of Youth“. وسعر التذكرة: 25 جنيه.

ونختم الجولة بتاعتنا مع يوم السبت، وبيكون فيه حفلة غنائية بيقدمها سمير جورج وإيمي فريجا في باب 18 للفنون بمصر الجديدة. الفنان المتميز علي الهلباوي، هيكون له حفلة على مسرح النهر بساقية الصاوي. سعر التذكرة: 35 – 40 جنيه. ومحبي الزار والأغاني الشعبية التراثية، دول بقى ميعادهم مع حفلة فرقة أسياد الزار على مسرح الضمة. وسعر التذكرة: 30 جنيه.

استمتعوا!