The Definitive Guide to Living in the Capital , Cairo , Egypt

مافيش ذكرى في البيت أجمل من صورة ست حامل لامسة بطنها برقة، أو صورة بيبي مولود مغمض عينيه وعلى وشه ابتسامه مالهاش سبب، أو صورة أب حاضن ابنه، نتيجة لاهتمام الأجانب بتصوير صور الحمل والبيبي اللي لسه مولود والأطفال، وانتشار الصور دي على السوشيال ميديا، بدأ يدخل في مصر مفهوم جديد هو الـ Family Photography، زمان الناس لما كانوا بيحبوا يتصوروا كانوا بيروحوا ستوديو يدفعوا 20 ولا 30 جنيه وياخدوا صورة سوا كلهم واقفين أو قاعدين فيها، وراهم خلفية سخيفة فى خمس دقايق ومعمول Retouch على وشهم وده أكتر شيء سىء في الكون، الموضوع كان بيتعمل من غير أي شغف أو فن لحد ما ظهر في مصر المفهوم ده وبقينا نلاقي مصورات ومصورين متخصصين في الحتة دي بس.

ليه الجزئية دي محتاجة تخصص؟ لأنها بتحتاج صبر كبير جدًا وبُعد نظر ورؤية، وتحتاج خلق بيئة مناسبة للتصوير ده، ومكان مناسب لوجود بيبيهات وأطفال، لازم المكان يكون فيه مراية وإكسسوارات كتير وحمام ومكان للراحة لأن الأطفال مش بيطلّعوا شغل حلو غير لو عاملناهم بصبر شديد.

أهم حاجة كآباء تعملوا حسابكم أن الموضوع بيحتاج تنسيق لبس كويس والاتفاق على تيمة أو Theme مع المصور وتجهيز ميزانية كويسة تبدأ من 500 لـ 3000 جنيه تقريبًا (بيقل المبلغ في فترة العروض) وفقًا لعدد وحجم الشغل اللي هيتعمل وسعر المصور لأن النوع ده من التصوير علشان يطلع بالشكل المبهر اللي بنشوفه بيحتاج وقت طويل وإكسسوارات غالية وكاميرات بروفيشنال جدًا، الأسعار مش بتتقال بشكل مباشر على صفحات الفيسبوك وده لاختلاف طبيعة الصور وعددها، فمش هتلاقوا في التقرير ده أي أسعار، بس ممكن تراسلوا الصفحات اللى هنقول لكم عليها فى الموضوع:

Photogenique Photography

فوتوجينيك هو مشروع المصورة الفوتوغرافية هايدي فتحي المتخصصة في تصوير الحوامل والبيبيهات والأطفال، الستوديو موجود في بيفرلي هيلز ومتجهز بشكل كويس جدًا وفيه هناك إكسسوارات وأفكار مختلفة، هايدي صورت مشاهير زي هند صبري وعماد متعب ويارا نعوم وإنجي وجدان وغيرهم وصفحتها فيها مئات الأفكار اللي ممكن تختاروا منها، هايدي مصورة محترفة نرشحها بقوة!

First Curls Baby & Kids Photography

فيرست كيرلز من أوائل الستوديوهات اللي اتعملت لتصوير الأطفال وهو ملك الفنانة المصورة كوكلا رفعت، بخلاف الأفكار الكتير اللي هتلاقوها على الصفحة وجودة الخامات والتصوير، كوكلا من أشهر المصورات في مصر، سافرت بره كتير وصورت حضارات الشعوب المختلفة ومشاهير كتير جدًا، من أعمالها أفيش باسم يوسف المشهور اللي كلنا شوفناه على كوبري 6 أكتوبر بتاع برنامج البرنامج.

كوكلا مصورة صبورة جدًا ومحترفة وعارفين صورها وشغلها بشكل شخصي ولذلك هي في أعلى قائمة ترشيحاتنا، الستوديو في مصر الجديدة.

We Care Photography

من المشروعات اللي حبيناها جدًا علشان إنتاجها مختلف بجانب أن أسعارهم تعتبر مناسبة جدًا، إلا أنهم متميزين في تقديم جلسات التصوير الخارجي Outdoor من خلال جولة على صفحتهم لقينا عندهم عدد كبير من الصور الخارجي الحلوة، كمان هما بيصوروا في المسشفى يوم الولادة صور جميلة فعلًا وتلمس القلب، من الناس اللي فيه رد فعل كويس على شغلهم رغم أنهم جداد نسبيًا في السوق.

مافيش تفاصيل على الصفحة عن أصحاب المشروع والسيرة الذاتية الشخصية بتاعتهم لكن إحنا عارفين أن المصورة يمنى أبو بكر ومحمد عبد العاطى هما كلمة السر ورا We Care Photography.

Sweet Pea Photography

الفرجة على صور أماني إسماعيل مؤسسة Sweet Pea من أكثر الحاجات المريحة نفسيًا اللي حصلت لنا النهارده! فيه قدر كبير أوي من الرومانسية والهدوء ودرجات الباستيل الهادية في معظم شغلها، ده طبعًا بجانب الاحترافية العالية اللي فيه، ولأن أماني معروفة بشغفها لتصوير البيبيهات هتتكلم عن ده في إيفنت Egypt Photo Summit اللي هيتعمل شهر أبريل القادم، الستوديو موجود في ميدان لبنان في المهندسين.

Yasmin Thabet Photography

ياسمين ثابت بتصور بحب وشغف من 3 سنين ومؤخرًا أطلقت مشروعها لتصوير الأطفال والعائلات وهي مجهزة عدد كبير من الـProps  أو الإكسسوارات وممكن تتفرجوا على شغلها على الصفحة، لحد دلوقت شايفين بورتفوليو جميل لصور الأطفال اللي لسه مولودين جديد.

من الحاجات المختلفة أن ياسمين بتعمل جلسات تصوير للعرايس (السيدات) قبل الفرح اسمهاBoudoir photo shooting  وبتقدمها بشكل مناسب لثقافتنا وعاداتنا وتقاليدنا في مصر.

Belle’s Photo Art

"التصوير هو طريقة بنعبّر بها عن مشاعرنا.. التصوير بيفكرنا دايمًا بكل الحاجات الصغيرة بعد ما بننسى كل حاجة"، دي الجملة المكتوبة على Cover صفحة Belle’s Photography للمصورة إيمان خيري اللي صدّقت الجملة دي جدًا وبدأت تصور الأطفال والعائلات.

إيمان عاملة أفكار حلوة مع الأبهات ودي حاجة ما شوفناهاش كتير عند الستوديوهات التانية.

إحنا كدة خلصنا! خدوا لفة على صفحات كل المصورين وقولوا لنا حبيتم شغل مين أكتر؟