The Definitive Guide to Living in the Capital , Cairo , Egypt

كل واحد فينا جواه طفل صغير لسه بـ يحب الكارتون بكل أشكاله وأنواعه ولغاته، والمفاجأة في دليل أحداث نهاية الأسبوع ده، أن عندنا في الثلاث أيام حفل رسوم متحركة، من كل بلاد العالم سواء بلاد عربية زي مصر وسوريا ولبنان، أو بلاد غربية زي فرنسا وأنجلترا.

أستعدوا لثلاث أيام مليانين تشويق وعودة للطفولة.

نبدأ بيوم الخميس وعرض الفيلم الأمريكي “Sita Sings the Blues” بزاوية، وده الفيلم الافتتاحي لسلسلة أفلام الرسوم المتحركة الطويلة والقصيرة من العالم كله، وسعر التذكرة 20 جنيه. كمان  فيه عرض للفيلم الجزائري “The Battle of Algiers” في بيت الوادي، واللي بـ يناقش حروب الجزائر، والحائز على جائزة الأسد الذهبي 1966، والدعوة عامة. لكن لو عاوز تفصل خالص وتغير جو، ساقية الصاوي عاملة “حفل stand-up comedy” والتذكرة بـ 25 جنيه.

ولو عاوز تستمتع بموسيقى جميلة، “حفل فرقة سلالم” على مسرح الجنينة واللي بـ تحتفل على مرور 9 سنين عليها في عالم الفن، وسعر التذكرة 20 جنيه، غير شاملة تذكرة دخول حديقة الأزهر.

وتكملة للإستجمام والروقان وصفاء الروح والذهن، مهرجان سماع الدولي للإنشاد عاملين حفلتين النهارده، واحدة في شارع المعز وهي حفلة لثلاث فرق عالمية من المغرب، أمريكا وإندونيسيا، وسعر التذكرة 30 جنيه. والثانية في دار الأوبرا المصرية وهي حفلة لفرق عالمية من سوريا، نيجيريا وبنجلاديش بساحة الهناجر، والدعوة عامة. لكن لو عاوز تتفرج على “حفلة المولوية المصرية“، هـ تلاقيها على مسرح الجنينة، والتذاكر متاحة بشباك التذاكر.

ننتقل ليوم الجمعة، اللي بـ نبدأ فيه برضه “بعرض لأفلام رسوم متحركة عربية قصيرة”، من الدول الآتية: مصر، لبنان، سوريا، الأردن، فلسطين، وتونس. سعر التذكرة 20 جنيه. ولو أنت مهتم بفنون الكوميكس، فيه “معرض لفنون الكوميكس والمانجا” لفنانيين من ألمانيا بساحة الفينواز، والدعوة عامة.

أما لو عاوز تسترجع روح الأغاني القديمة الجميلة بطريقة عصرية، مركز فوتوبيا للتصوير مستضيف “حفلة لفرقة بهية” المعروفة بروحها الثورية وأغانيها للشيخ إمام، وسعر التذكرة 20 جنيه. كمان دار الأوبرا المصرية عاملة حفلة المسرح الصغير، واللي بـ تقدمه فرقة “البغدادي” بقيادة الفنان مجدي البغدادي، والتذاكر متاحة بشباك الحجز.

نختم بيوم السبت، واللي بـ يبدأ معانا  اليوم برضه “بعرض الرسوم المتحركة الغربية” بزاوية، واللي بـ يشمل أفلام من فرنسا، المملكة المتحدة، المكسيك ولوكسومبورج. سعر التذكرة 20 جنيه. لكن لو أنت من محبي حفلات الأداء الحركي، مركز طلعت حرب الثقافي  عامل عرض “لفرقة الصامتين” للأداء الحركي، والمعروف أن الفرقة جميع أعضائها من الصم والبكم. الدعوة عامة.

ولعشاق البيتزا عندنا لكم مفاجأة، حيث أن “مطعم إل ديفينو للبيتزا” عامل ليلة  علشان يقدم فيها الطهاة كل أنواع البيتزا الموجودة بقائمة الطعام، وتقدر  تذوق كل أنواع البيتزا إلى الانهائية وما بعدها، يعني كل اللي نفسك فيه وأكثر، وسعر الفرد الواحد 100 جنيه بس. ممكن بعد كده تروح تحضر “حفل موسيقى للفنان إبراهيم الموجي” بدار الأوبرا المصرية، والتذاكر متاحة بشباك التذاكر. ونختم “بحفلة التنورة” في وكالة الغوري، واللي تذكرتها بـ 5 جنيه.

طبعًا دي مش كل أحداثنا الأسبوعية، لو حابب تعرف أكثر إحنا بـ ننشر أحداث كل يوم طوال الشهر، تقدر تعرفها من هنا.