The Definitive Guide to Living in the Capital , Cairo , Egypt

بـ نكمل معاكم رحلتنا في مهرجان القاهرة الدولي لسينما المرأة، واللي مستمر معانا وبـ يمتعنا بأفلامه زي "فيلم لقاء مع أرض مفقودة" الفلسطيني أو فيلم "ألف رحمة ونور" بمعهد جوته. كمان فيه معارض فنية متنوعة في الثلاثة أيام منهم اللي مازال مستمر من الأسبوع الماضي تقدر تشوفهم من خلال الأجندة بتاعتنا.

ونبدأ كالعادة بيوم الخميس وحفلات الأسبوع ده متنوعة ما بين المختلف والتقليدي، نبدأ بالمختلف وحفلة فرقة "مزامير النيل" على مسرح الضمة، واللي بـ يقدمها فنانين من أهل الصعيد، واللي بـ يقدموا معظم حفلاتهم في قرى ومراكز محافظات الصعيد خاصة سوهاج وأسيوط، وبـ يقدموا عروضهم لأهل الصعيد المقيمين في القاهرة. سعر التذكرة عند الحجز 20 جنيه، وعند الباب 30 جنيه.

وحفلة "فرقة الطنبورة" بمسرح الضمة، واللي بـ يقدمها فنانين بورسعيديين، بـ يغنوا ويرقصوا ويعزفوا على آلات الطنبورة والسمسمية والطبلة والرق والمثلث والصاجات والشخاليل في تلقائية تحافظ على الروح الأصيلة للتراث البورسعيدي، وأسعار التذاكر: 30 جنيه عند الدخول و20 جنيه عند الحجز مسبقًا.

وبالنسبة للحفلات التقليدية فموعدكم مع حفلة "أم كلثوم" على مسرح ساقية الصاوي،  واللي بـ يقدمه مسرح الساقية للعرائس على أنغام أغنيتي "كل ليلة وكل يوم – ودارت الأيام". وسعر التذكرة 15 جنيه لغير الأعضاء، بينما لأعضاء الساقية 5 جنيه.

وحفلة الفنان مدحت صالح اللي بـ يعود لجمهوره من جديد في جامعة مصر للعلوم والتكنولوجيا، وأسعار التذاكر: 200 – 175 – 150 جنيه، وخلي بالكم أن الدخول بالملابس الرسمية.

وننتقل ليوم الجمعة، لكل محبي الأغاني المعاصرة حفل فرقة "وسط البلد"، "كايروكي" و"كراكيب" بالحديقة الصينية، أسعار التذاكر 130 و90 جنيه. ولكل اللي بـ يحب يسمع حاجة مختلفة، حفلة فرقة النفيخة بساقية الصاوي، واللي مكون من خماسي آلات النفخ النحاسية: محمد سواح على آلة الترومبيت، أمير إبراهيم وأحمد إسماعيل على الترومبون، مساكي على آلة الباص توبا ورامي سامي على الساكسفون، وسعر التذكرة 20 جنيه.

ونيجي بقى للقاء السحاب حفل "لقاء الشمال مع الجنوب" بدار الأوبرا المصرية، واللي هـ يغني فيه فرقتي "نوبانور" من النوبة، و"الطنبورة" البورسعيدية، واللي بـ يقدموا أغاني شعبية خاصة بمنطقة كل واحد فيهم، وسعر التذكرة 25 جنيه.

أما عن الفن الهادئ الكلاسيك حفلة الفنانة رانيا يحيي عازفة الفلوت بدار الأوبرا المصرية، والتذاكر متاحة بشباك الحجز.

وأخيرًا لو حابين تشوفوا صور مختلفة جربوا تزوروا، معرض "حياة لاجيء في مصر" بساقية الصاوي، والدعوة عامة.

وننتقل ليوم السبت وحفلة مهرجان الموسيقى بالحرم اليوناني، وده حفل موسيقي يجمع العديد من نجوم الشباب منهم: دينا الوديدي، وحاتم بيت بوكس، وزاب ثروت وأسفلت وغيرهم. سعر التذكرة 70 جنيه.

ولمحبي الغناء الصوفي، نحب نقول لكم عن حفل المنشد الصوفي الشيخ زين محمود في رووم آرت سبيس، وسعر التذكرة 30 جنيه.

أما عن المهرجان القومي للسينما المصرية: فـ هيقدم  لنا مجموعة من الأفلام الروائية والتسجيلية القصيرة بسينما الهناجر، أبرزها "نجم كبير" لروجينا بسالي، "أمل دنقل" لمصطفى محفوظ، و"حياة طاهرة" لمهند دياب. التذاكر متاحة بشباك الحجز، ونختم بحفلة التنورة في مركز إبداع وكالة الغوري، والتذكرة بـ 5 جنيه.

لو عاوز تعرف عن أحداثنا أكثر تقدر تدخل على أجندتنا اللي بـ ننشر فيها الأحداث الجديدة أول بأول.

ويك إند سعيد!