The Definitive Guide to Living in the Capital , Cairo , Egypt

كل سنة وإحنا بخير.. الفترة دي بنحتفل بمرور ١٢ سنة على انطلاق تجربة كايرو ٣٦٠ (دليلك للحياة في العاصمة)، ١٢ سنة وإحنا على التزامنا معاكم بتغطية الأحداث الفنية والثقافية والسينمائية في العاصمة، وحتى أماكن السهر والأكل وقضاء الوقت الجميل. 12 سنة وإحنا بنحب التجربة، وبعتبرها أكتر بكتير من مجرد تجربة عمل لنا.. تعالوا نحكي معاكم عن ١٢ سبب تخلي تجربة كايرو ٣٦٠ تجربة مختلفة واستثنائية، مش مجرد موقع إنترنت والسلام.

1. علشان بنحب القاهرة بجد

كل واحد في فريق كايرو ٣٦٠ هو عاشق للقاهرة.. بحيويتها وتجددها، نهارها الصاخب المليان تفاصيل، وليلها الدافي اللي بيطبطب على القلوب. نيلها اللي مايعرفش فرق بين غني وفقير، وبرجها وأهراماتها ومتاحفها ومدارسها وجوامعها وكنايسها. بالنسبة لنا دي مش شعارات بنكتبها وخلاص. دي حياه بنعيشها كل يوم. وبنعشق تفاصيلها. وبنحب ننقل لكم أحلى مافيها.

2. علشان بنحب ناكل في القاهرة!

 عاصمة بحجم القاهرة، هاتلاقي فيها أكل من كل صنف ولون. بداية من عربيات الفول والطعمية والكبدة والسجق، وحتى مطاعم الفنادق الفايف ستارز، مرورًا بالكوارع والكشري والسوشي! وفي كل مطعم في القاهرة هتقابل محرر من كايرو ٣٦٠… ذواقة عارف يستمتع إزاي بالأكل، وينقل لكم التجربة بكل حيادية وأمانة ومراعاة لاختلاف الأذواق..

إحنا مش بس بناكل في القاهرة.. إحنا بنحب الأكل في القاهرة. وبنحب ننقل لكم تجربتنا مع الأكل في العاصمة.

3. علشان بنحب نخرج في القاهرة

سواء لوحدك أو مع شلة.. الصبح أو بالليل.. في وسط البلد أو في كومباوند فخم.. الخروج في القاهرة له طعم مختلف. وفي كل مكان خروج هاتلاقي محرر من كايرو ٣٦٠ يقول لك أحلى الأماكن اللي تستاهل الزيارة. علشان إحنا مش بس بنحب نخرج في القاهرة، إحنا بنحب نرشح الأماكن الحلوة، ونعرف نقيمها كويس.

4. علشان بنحب سينمات القاهرة

 مهما انتشرت تطبيقات مشاهدة الأفلام زي نتفليكس وغيرها، تفضل مشاهدة الأفلام في السينما لها سحر خاص. الضلمة اللي بتخليك تركز.. الشاشة العملاقة اللي بتشوف فيها أدق التفاصيل.. ومحرر كايرو ٣٦٠ اللي مش بيعمل في حياته غير أنه يتفرج على الأفلام ويقيمها، ويقيم تجربة المشاهدة بشكل عام، ويقترح عليك أحلى أفلام حسب مودك، أو سنك..

5. علشان بنستمتع بالحياة الثقافية في القاهرة

 الحياة الثقافية هي المقياس اللي بتتقيم على أساسه تقدم الشعوب.. وفي القاهرة محررين كايرو ٣٦٠ بيستمتعوا برصد الحياة الثقافية في المتاحف والمعارض والمكتبات والأتيليهات والمراكز الثقافية ودور الأوبرا.. كل ده مع أسعار التذاكر ومواعيد العمل. علشان تبقى عندكم الصورة الكاملة.

6. علشان بنحب الحياة الصحية في القاهرة

إحنا طبعًا عارفين أنه تحدي صعب أننا نفضل محافظين على صحتنا الجسدية والعقلية وسط كل الأحداث الصعبة اللي بيمر بيها العالم. لكننا بنلف القاهرة علشان نعرف لكم أحسن صالات الجيم، وأماكن ممارسة اليوجا والتأمل. علشان إحنا شايفين أن العقل السليم في الجسم السليم. وبنحاول طول الوقت نعمل موازنة بين اهتمامنا بالنجاح في حياتنا، وبين أن يكون لنا أنشطة رياضية صحية. للجسم والنفسية.

7. علشان متفهمين ميزانيتك!

 في كل مرة هتعوز تعزم أصحابك على الغدا، أو تزور مكان جديد، أو تدخل السينما أو المسرح، هاتلاقينا حاطين في اعتبارنا أننا ننقل لك أسعار الأكل/ المواصلات/ التذاكر..الخ علشان إحنا عارفين أن الخروجة لازم تبقى على قد الميزانية.. وسواء كانت ميزانيتك محدودة، أو كنت ماشي بمبدأ تامر حسني (اصرف ما في الجيب واشحت بكره عادي) هاتلاقي دايمًا خروجه على قد الميزانية.

8. علشان بنحب نعيشها ببساطة

الحياه معقدة بما فيه الكفاية، علشان كده كل ما بتظهر خدمة جديدة توفر وقتك وفلوسك وتشتري راحة بالك، تلاقينا بنحبها ومهتمين ننقلها لك.. سواء الـApplications اللي تخليك تخلص معاملاتك الحكومية منغير ما تنزل من البيت، أو المواقع الإلكترونية اللي توفر عليكم مشوار البنك، وأي حاجة جديدة بتخلي حياتنا أبسط وأسهل واسرع هتلاقينا بنشجعك تجربها فورًا.

9. علشان بنحب نسمع مزيكا في القاهرة

الموسيقى هي غذاء الروح.. وسواء عاوز تسمع حفلة موسيقية في الأوبرا، أو عاوز تحط السماعات في ودانك وتغير مودك وأنت راجع البيت بعد يوم شغل طويل. أو عاوز تغير البلاي ليست اللي زهقت منها في الجيم.. هاتلاقي عندنا ترشيح لأحسن تراكات على يوتيوب وساوند كلاود، وأحدث ألبومات مكسره الدنيا.. علشان إحنا عندنا محررين مش بس بتفهم في المزيكا.. دي كمان بتفهم دماغ الناس وتعرف ترشح لها الأحلى دايمًا.

10. علشان إحنا معانا خلطة القاهرة السرية!

الحياه في القاهرة محتاجة خلطة سحرية أجدع من بتاعة كنتاكي!… حبة فهلوة على شوية نصاحة… وكتير من الطاقة الإيجابية.. كل ده مع رشة كوميديا وحبة رومانسية وشوية روقان بال.. إحنا اللي معانا المقادير بتاعة الخلطة دي. علشان إحنا فريق عمل مطرقع مش هتلاقوا زيه تاني. وده بيخلي كايرو ٣٦٠ شباب على طول ومواضيعها (ملمسة) مع كل الطبقات والأعمار.

11. علشان بنحب بعض!

تجربة العمل في كايرو ٣٦٠ مش تجربة عمل تقليدية بيحكمها مواعيد شغل أو عدد موضوعات لازم نشتغل عليها. أسرة العمل كلها ناس بتحب بعض بجد، قلبها على قلب بعض، وزي ما أننا مش بننسى نعمل شغلنا بكل حب وحماس، مش بننسى نهتم ببعض، ونسأل على بعض، ونساند بعض في أي مشكلة أو أزمة.. شعارنا: الكل واحد في الأحزان قبل الأفراح.

12. علشان بنحبك أنت!

 وعلشان السبب الأهم بيكون دايمًا السبب الأخير.. أنت يا عزيزي القارئ أهم سبب بيخلينا نقدم تجربة مختلفة في كايرو ٣٦٠.. أنت اللي بتقرا أحدث مواضيعنا أول ما تنزل، وتبعت لنا تعليقات جميلة على السوشيال ميديا.. وأنت اللي بتطلب منا نغطي أماكن معينة أو فعاليات مهمة لك. بنتكلم هنا عن كل شاب وبنت، زوجة وأم وجدة، أب أو عازب، موظف حكومي أو في مكان شغل خاص. أنتم يا كل محبين ومتابعين كايرو ٣٦٠ في كل مكان. على اختلاف أذواقكم وأعماركم.. ياللي بتثبتوا لنا كل يوم أن الحب بيقابله دايمًا الحب. والمجهود الحقيقي بيقابله دايمًا التقدير والاحترام  منكم.. نحب نقول لكم تجربتنا هي صفر على الشمال بدونكم.. وأننا بنحبكم ١٢ مليون مرة بمناسبة أننا تمينا ١٢ سنة معاكم.