The Definitive Guide to Living in the Capital , Cairo , Egypt

أغلبنا بيزهق من طوابير شبابيك تذاكر المترو، وخاصةً في وقت الذروة، ودي تعتبر واحدة من المشاكل المهمة اللي بتواجهه إدارة تشغيل المترو، لكن المرة دي كان في قرار بحل مبتكر للمشكلة دي، وهو “الكارت الذكي” واللي هو عبارة عن محفظة نقدية بديلة عن التذكرة التقليدية، وبتقوم بنفس دورها، وتقدروا بعد ما تشحنوه، تعدوا من ماكينات المرور بسهولة ويسر، وخلال السطور اللي جاية هنقولكم على كل اللي محتاجين تعرفوه عن الكارت وومميزاته وكيفية شراءه.

الكارت الذكي زي ما قولنا هو محفظة نفدية أو نقدر نعتبره تذكرة إلكترونية، وتقدروا تشتروه من شبابيك المترو من خلال استمارة بتتملي بـ 5 جنيه، وسعر الكارت نفسه 25 جنيه، وتقدروا تشحنوا الكارت بأي فلوس بعد كده، بدايةً من 10 جنيه، ولحد 200 جنيه، وبيبقى متاح لأي عدد محطات، وبيتم حساب السعر للتذكرة حسب المسافة بين محطة الصعود والنزول، وده هيجنبكم الوقوف في طوابير طويلة.

ممكن تستخدموا الكارت بنفسكم أو لأي حد معاكم في الرحلة جوه المترو، وبدون أي قيود، يعني مش مرتبط بشخص معين، وده علشان يسهل عملية التحرك داخل محطات المترو للركاب. والكارت بيتم تفعيله بشكل فوري وبدون إسم، وبيبقى صعب التلف، لأنه مغناطيسي، وكمان صلاحيته 5 سنوات من تاريخ إصداره، وسهل الإستخدام، بمجرد انكم تطلعوا المحفظة وتحطوها على الماكينة علشان تمروا،يعني مش محتاجين تطلعوه بره.