The Definitive Guide to Living in the Capital , Cairo , Egypt

العاصمة المصرية احتضنت محلات مهمة من سنين طويلة، ليها حكايات عظيمة، بتثبت إن القاهرة مش مجرد مدينة، لكنها عالم كامل من الحكايات المدهشة. وفي الموضوع ده، هنحكي لكم عن راجل أرمني، نجا من مذابح الأرمن في الحرب العالمية الأولى، واحتضنته القاهرة، وأصبح أشهر ساعاتي ومصلح ساعات فى مصر، ولسة لحد النهارده محله موجود في قلب حي العتبة.

محل “بابازيان” في قلب ميدان العتبة بالقاهرة، الساعات اللي على حوائطه ماوقفتش أبدًا من أكتر من 100 سنة، أسسه الجد “فرنسيس” في سنة 1903، وزباينه من هواة جمع التحف، وأغلب رواده من عشاق الساعات والتحف، اللي ورثوا ساعات نادرة عن أجدادهم.

بمجرد ما هتدخل المحل اللي بيمتلك أقدم ساعات في العالم، هتحس إنك رجعت بالزمن للقاهرة الجميلة زمان، جميع ساعات الحائط الموجودة في المحل عمرها حوالي 100 سنة، لما كان شكل الساعات مختلف عن شكلها الحالي.

في المحل عدد كبير من الساعات النادرة الأقرب للتحف، والساعات الخشبية الضخمة، والساعات اللي بتشتغل بالبندول (الرقّاص).

تأسس المحل في سنة 1903 على يد فرنسيس بابازيان، اللي استقر في مصر بعد ما اضطر للهرب من جحيم “الإمبراطورية العثمانية” قبل الحرب العالمية الأولى، ووصل مصر، اللي احتضنته وفتح فيها محل لبيع وتصليح الساعات.

وخلال عقود من الزمن، انتقلت إدارة محل “بابازيان” من الجد المؤسس “فرنسيس” إلى أبنائه ثم أحفاده، لحد ما وصلت لملكية آشود بابازيان، اللي بيقول إن أكتر حاجة بتميز محلات “بابازيان”، هي وجود قطع غيار للساعات القديمة والحديثة، وده بيخلي المحل قادر على تصليح أي ساعة مهما كانت قديمة، ومهما كان نوعها أو حالتها.

وعن الساعات النادرة والقديمة المعروضة داخل المحل، بيؤكد “آشود” أنها ساعات قديمة جدًا، وهي للعرض بس، يعني مش للبيع، وبيضيف إن أغلب الزباين اللي بيترددوا على المحل بيكون هدفهم تصليح ساعات قديمة ورثوها عن الأجداد.

حوائط المحل عليها عدد من الصور القديمة اللي بيظهر فيها أصحاب المحل من عشرات السنين، ده غير إعلانات لـ “بابازيان” اتنشرت في مجلة “المصور” خلال الثلاثينيات.

إزاي توصلوا للمحل النهارده؟

محل “بابازيان” موجود في 3 ميدان العتبة، وبيفتح يوميًا من الساعة 10 صباحًا، والإجازة الأسبوعية يوم الأحد، لما تزور المحل هتحس إنك روحت متحف متخصص في الساعات.