The Definitive Guide to Living in the Capital , Cairo , Egypt

القاهرة لا زالت باقية على الوعد، ومافيش يوم معدي آهو إلا وبنشوف فيه قائمة لا بأس بها من الفعاليات الفنية والثقافية اللي بتفتحلنا اختيارات لطيفة لقضاء الوقت، والنهارده برضه وفاء القاهرة جاري في فعالياتها، لكن إحنا قررنا نشاور لكم فيها على الحدث الأبرز، ونكلمكم عنه شوية باستفاضة.

النهارده "دكة أضف" اللي بتمثل الجناح الخدمي المجتمعي لمؤسسة التعبير الرقمية العربية "أضف" هتبدأ فعاليات عروضها السينمائية لشهر سبتمبر 2016، وهتصحبنا في جولة جديدة إلى إحدى بقاع العالم من خلال العروض دي، ودي القيمة الحقيقية لكل جولة من جولات سينما الدكة، أن الموضوع مش مجرد عروض لأفلام لاقت قبول وحققت صدى جيد عند الجماهير والنقاد والسلام، لأ الموضوع بيكون ليه بعد ثقافي قوي، البعد اللي بيخلي القائمين على اختيار العروض يحددوا نطاق جغرافي محدد، وفترة زمنية محددة، ويبدءوا يطوفوا في المساحة الزمانية والمكانية المختارة ويختاروا أفضل الأفلام اللي اتعرضت فيها واللي بتعبر بشكل ما عن أحداث هذه الفترة، وعن ثقافة أهل هذه البقعة، يعني باختصار كده: الناس دي بتقدم لك وجبة معرفية في دائرة تاريخية وجغرافية محددة من خلال عروض الأفلام المختارة.

جولة سبتمبر هتحمل عنوان عريض نصه: "كوابيس ألمانيا الشرقية"، العنوان اللي بيشاور لنا على المكان والزمان اللي هتدور فيهم أحداث الجولة، الجولة اللي هتكون محطتها  الأولى النهارده مع فيلم "Barbara"، اللي هيبدأ عرضه في تمام السادسة والنصف مساءً، ثم فيلم "The lives of others" يوم الثلاثاء 20 سبتمبر، ثم فيلم "GoodBye Lenin" يوم الثلاثاء 27 سبتمبر، ووجب التنويه أنه الدعوة عامة لحضور جميع العروض.

يذكر أنه بانتهاء العروض دي هتكون سينما الدكة أتمت عرض 102 فيلم سينمائي مختلف، بين المصري والعربي والأجنبي.

للمتابعة والاستفسار تقدروا تتواصلوا مع دكة أضف من خلال صفحتهم على فيسبوك، ولو حابين تعرفوا أكتر عن مؤسسة "أضف" وطبيعة شغلها ومشاريعها تقدروا تشوفوا مقالنا السابق عنها من هنا.