The Definitive Guide to Living in the Capital , Cairo , Egypt

عمر مراد

“كل واحد له ذوقه”.. حقيقة بتشكل اختياراتنا في الدنيا، وحتى في الخروجات، وكل حديقة في القاهرة لها حاجة بتميزها عن باقي الحدائق. ومؤخرًا قررت الحكومة المصرية تسيب الاختيار لكل واحد وذوقه في مكانه المفضل يقضي فيه يوم كامل بالمجان، وهو يوم الجمعة 6 أكتوبر 2023، وده بمناسبة الاحتفال بنصر أكتوبر العظيم.

تعالوا نتعرف على 5 حدائق تقدر تروحهم مجانًا يوم الجمعة.. يوم النصر!

حديقة جبلاية الأسماك

الحديقة بتتميز بتصميم مختلف، لأن تكويناتها المعمارية اللي على هيئة خياشيم الأسماك المكونة من الطين الأسوانلي المخلوط بمادة الأسروميل والرمل الأحمر خلاها تحفة فنية، بتضم جواها 40 حوض من الأسماك النادرة، وحوض كمان للأسماك المفترسة وبانوراما لعرض الأسماك المحنطة. كمان اشتهرت بأنها مكان تجمع العشاق والمحبين علشان كدا اتغنى فيها أغاني غرامية كتير، فيهكون أنسب مكان ليك وأفضل مكان للمواعيد الغرامية مع حبيبك، ومش كدا وبس! لا هتقدر تعمل أنشطة كتير، زي التمشية وتستمتع بمنظر الخضرة والأسماك، وتسمع سيمفونية طبيعية طالعة من كهف الحديقة بسبب تصميم الحديقة المختلف.

حديقة الحرية

الحديقة كانت حلم من أحلام الخديو وخطته لتطوير القاهرة وجعلها باريس الشرق، وأمر بإنشائها في عام 1876. بتبلغ مساحتها 7 أفدنة ومتقسمة لنصفين متناظرين، هتلاقي جواها أشجار معمرة وأحواض ورد كتير بتحتضن تماثيل عظماء مصر، زي طلعت حرب، أحمد شوقي، اللواء عبد المنعم رياض. وهناك تقدر تتمشى وسط الخضرة، قعدة حلوة تقعدها مع الحبايب، تاخد صورة ومتنساش اضحك الصورة تطلع حلوة.

حديقة العبور

لو بتحب الهدوء وصاحب مزاج، هتبقى أفضل حاجة لك حديقة العبور بالزمالك، واللي بتتميز بموقعها الجذاب على النيل، هتقدر تعمل كل اللي بتحبه هناك، من تمشية وسط الخضرة، الجلوس على النيل، سماع الموسيقى المفضلة، وأكلتك الحلوة اللي تقدر تاخدها معاك أو تقدر تجيبها من أي كافية أو مطعم موجود، المكان  تقدر تمارس فيه اليوجا كمان، وفي الآخر ماتنساش إن اليوم كله بالمجان.

الحديقة اليابانية

لو بتحب التميز، فهيبقى اختيارك للحديقة اليابانية اللي مصممة على الطريقة الأسيوية، وبتضم تماثيل كتير مختلفة وسط الخضرة والأشجار اللي بتشكل لوحة فنية علشان طريقة قص الأشجار والعناية المختلفة بيها.

حديقة الأزهر

من أكبر الحدائق وأفضلها وموجودة في القاهرة التاريخية، علشان كدا هيكون أنسب مكان للخروج مع الأسرة علشان مساحتها الكبيرة واللي الأطفال هيقدروا ياخدوا راحتهم وكمان هيلاقوا الألعاب اللي بيحبوها، وجواها أنشطة كتير زي الجري جواها، وهتلاقي كمان مطاعم وكافيهات كتير.. استمتعوا!