The Definitive Guide to Living in the Capital , Cairo , Egypt

المرض:
عارف لما يكون حد مريض مرض ثقيل، وفي نفس الوقت بـ يسبب له ألم شديد جدًا؟ وقتها بـ يمشي الدكتور المعالج معاه في سكتين: السكة الأولى تسكين الألم الناشئ عن المرض علشان المريض ما يموتش من الألم، والسكة الثانية تشخيص المرض تشخيص دقيق، وبدء العمل على القضاء عليه من أصله.

كثير جدًا من مشاكل المجتمع بـ تبقى شبه الأمراض المؤلمة دي، لكن الفرق الكبير جدًا أن كثير من اللي بـ يشتغلوا على علاجها بـ يركزوا على سكة واحدة من السكتين دول، وهي سكة المسكنات! وقليل جدًا اللي بـ يقدر يفهم أن المشكلة لسه ما اتحلتش وأن حل التسكين ده المفروض أنه يكون حل مؤقت جدًا جدًا.

يعني مثلًا.. مشكلة زي الفقر.. مش علاجها أبدًا أننا نروح نعطي للفقير فلوس ومساعدات.. ده جميل.. بس أكيد مش كفاية.. مهم جدًا أننا نفكر إزاي هـ نقدر نعالج المرض من جذوره، وده هـ يكون بـ تحويل الفقير ده من شخص محتاج طوال الوقت إلى شخص قادر على الإنتاج والكسب.. ساعتها نقدر نقول أننا نجحنا في علاج المشكلة عنده.

ارسم حلمك:

واحدة من المبادرات الشبابية اللي قررت تقوم بدور المعالج اللي بـ يخطط للقضاء على المرض بدلًا من التركيز على استخدام المسكنات وبس، الناس دول عملوا مشروعهم علشان يساعدوا الأسر الفقيرة المتعففة مع مراعاة نقطتين أساسيتين:

الأولى: أن الهدف مش هـ يكون تقديم المساعدات، الهدف هو سد حاجة الأسر دي بشكل نهائي.. وده هـ يكون عن طريق تحويلهم لأسر منتجة، النقطة الثانية: أن المساعدة دي تتم من غير ما يكسروا نفوس الأهالي ولا يحسسوهم أن فيه حد متفضل عليهم بحاجة.

وبعدين بدأوا يشكّلوا مشروعهم من مجموعة الأفكار والمحددات دي، وكان الشكل النهائي للـ Process اللي بـ تتم في المشروع هو أنهم بدءوا يعلموا أفراد الأسر دي إزاي ينتجوا، من خلال حرف يدوية بسيطة وغير مكلفة،  وبعد كده بـ يبدأوا يتابعوا مع الأسر إنتاجهم، وبعد كده بـ يسوقوا لهم منتجاتهم اللي عملوها ويبيعوها لهم ويعطوا لهم فلوسها، وبكده يكونوا حققوا المعادلة الصعبة وقدروا يحققوا شروطهم.. بامتياز.

المنتجات:
منتجاتهم يا سيدي بـ تكون كلها منتجات يدوية بسيطة، زي مثلًا Notebooks – Bookmarks  Handbags وهكذا بقى.. حاجات من النوعية دي.. والمهم أنهم كمان بـ يهتموا جدًا بجودة الإنتاج أكثر بكثير من غزارته، يعني مش مهم يكون الإنتاج كبير لكن مهم تكون جودته عالية علشان يكسبوا ثقة الناس، ويزيدوا ثقة أفراد الأسر الفقيرة في نفسهم وفي قدرتهم على الإنتاج الممتاز والمنافسة الحقيقية في السوق.

عن المشروع:

المشروع بدأ على أيد مجموعة من الشباب في جمعية "من أحياها" الخيرية، وهي جمعية أهلية تنموية بـ تشتغل على تحسين مستوى المعيشة في العشوائيات والقرى الفقيرة، وبما أن الشباب لسه بادئين في المشروع من فترة قريبة فأكيد بـ يواجهوا حاليًا المشكلة الأكبر اللي بـ تواجه أي حد في بداية مشروعه وهي: أن الانتشار بـ يكون قليل، وبالتالي الطلب على المنتج بـ يكون قليل، وبـ يبقى مهم جدًا العمل على تحقيق انتشار أوسع بشكل سريع، علشان يقدروا يسلموا عوائد البيع للأسر بسرعة معقولة وما يتأخروش عليهم.
عمومًا المنتجات اللي من النوع ده إحنا كده كده بـ نستهلكها كثير، فاللي يقدر يحوّل استهلاكه لهم يكون شيء كويس، منه انتفاع بمنتج هـ يشتريه، ومنه مساعدة كريمة لناس بـ تتعفف عن السؤال.. اثنين X واحد!

تقدروا تتواصلوا مع الشباب وتشوفوا منتجاتهم وتعرفوا أماكن منافذ بيعهم المتجددة على صفحتهم على الفيسبوك.. وتقدروا تتواصلوا معاهم تليفونيًا على الرقم 01140603332 وشاركوهم في رسم حلم أسر محتاجة كثير.