The Definitive Guide to Living in the Capital , Cairo , Egypt

العرق دايمًا مصدر إحراج وإزعاج، خصوصًا في أماكن التجمعات زي الجامعة ووسائل المواصلات والقعدة مع أصحابك، وكتير مننا مش عارفين إزاي يحلوا المشكلة دي، في السطور الجاية هنتعرف على شوية أفكار هتخلينا نتخلص من ريحة العرق وده هيدينا ثقة أكبر في نفسنا.

مزيل العرق

اختار مزيل عرق جودته كويسة، اتأكد أنه خالي من الكحول علشان المشاكل الصحية، وابعد تمامًا عن مزيلات العرق اللي ريحتها قوية، لأن ثبت علميًا أن الروايح القوية بتتفاعل مع العرق خصوصًا في ساعات النهار والحر، وبالتالي بتكون النتيجة النهائية ريحة عرق غريبة، علشان كده الأفضل تختار مزيل عرق خالي من الكحول وريحته بسيطة جدًا.

تغيير الملابس

كل يوم بتستحمى وبتستخدم مزيل عرق كويس ومع ذلك ريحة العرق موجودة؟ السبب في كده هو عدم تغيير الملابس بشكل مستمر، أفضل حاجة تغير هدومك كلها بشكل يومي، الملابس الداخلية والخارجية وحتى الشرابات، لأن جزيئات العرق بتلزق في هدومك وبتفضل موجودة حتى لو جسمك نضيف.

مواعيد الاستحمام

في ناس بتحب تاخد دش بالليل قبل ما تنام وتصحى تروح الشغل عادي، الكلام ده مش صح، الأفضل أنك تستحمى الصبح، بعد ما تقوم من النوم على طول، والسبب العلمي أن جزيئات العرق بتتكون بالليل في جسمك أثناء النوم، وبالتالي الأفضل تتخلص منها بأنك تستحمى الصبح.

بتلعب رياضة؟

تعرف أن الرياضة على المدى الطويل بتخلصك من العرق؟ في دراسات بتؤكد أن الناس اللي بتلعب رياضة بيحصل في جسمها حاجة كويسة وهي أن عملية إفراز العرق بتبقى منتظمة عندهم وبتحصل أكتر بعد مجهود بدني شديد، يعني بعد الرياضة مباشرة، وبالتالي بعد ما تاخد دش جسمك بيكون صحي والعرق قليل جدًا.

قلل التوابل والقهوة

تعرف أن الأكل بيأثر بشكل كبير على ريحة العرق؟ أيوة.. علشان كدة لازم تاكل أكل صحي، ابعد تمامًا عن التوابل الحراقة، لأنها بتزود العرق.. كمان قلل شرب القهوة.. لأنها بتزود جزيئات العرق .

البدائل الطبيعية

لو كنت بتحب البدائل الطبيعية يبقى لازم تروح زيارة لعطار كويس، في بودرة طبيعية ومادة اسمها ملح للعرق بتساعد جدًا في التقليل من ريحة العرق.. ومن مكونات طبيعية جدًا يعني ما فيهاش كحول ولا مواد صناعية.

بس كده؟

لأ كمان اهتم بشرب المياه لأنها أسهل الطرق للحصول على ترطيب للبشرة ومنع ارتفاع درجة حرارة الجسم، واهتم بالأكل الغني بالكالسيوم وفيتامين "ب".