The Definitive Guide to Living in the Capital , Cairo , Egypt

التوتر والإجهاد من أكتر الحاجات اللي بتسبب مشاكل في جسم الإنسان، ونقدر نقول إنهم السبب الرئيسي لموت ناس كتير. أكيد في طرق كتيرة نقدر بيها نبعد عن كل مشاكلنا، بس إنهاردة معانا واحدة من أحسن الأماكن للتنفيس عن كل مشاكلنا.

خلاص أيام الزعيق في المخدات أو ضرب الحيطة راحت عليها عشان ننسى بيها انفصالنا عن حد أو خناقة مع مديرنا في الشغل أو حتى زحمة القاهرة المميتة. مازن وأحمد نصرت استوحوا فكرتهم من Rage Room الموجودة في كندا وعملوها في قاهرة المعز.

” أنليشد-Unleashed” بيوفر فرصة هايلة علشان تتخلص من غضبك ونرفزتك في مكان آمن، وده بيكون بباقات مختلفة.

المكان مفتوح لأي حد عايز ينفس عن غضبه، والباقات هناك تبدأ من 150 جنيه لتكسير ست حاجات، لغاية 400 جنيه لو هتكسر 16 حاجة، وممكن تزودوا كمان لو عايزين. ممكن كمان تكسروا حاجتكم الشخصية.

طلعنا على الدور الثاني لأنليشد في كونكورد بلازا القاهرة الجديدة، واللي فيه لوبي مريح وحيطة عليها قواعد المكان المضحكة، مع شنطتين ملاكمة لو حبيتوا تسخنوا بيهم.

في الأول عرفونا بتعليمات الأمان وقواعد المكان، وبعدها نزلنا لغرفة الأدوات اللي لبسنا فيها خوذ أمان ودرع واقي للجسم وجوانتيات، وقالوا لنا على أحسن الطرق لتدمير القطع.

إحنا عن نفسنا طلبنا باقة تشاك نورس (400 جنيه) اللي بتقدم 16 قطعة وفيديو بيصور الملحمة اللي أنت هتعملها بينزل على صفحتهم على يوتيوب. وصلنا للغرفة وطلبوا منا نختار أغنية تشتغل وإحنا بنطلع كل غضبنا على الحاجات المسكينة.

الغرفة بيكون فيها “منطقة آمنة” فيها البرميل المعدن اللي بنسيب عليه حاجاتنا، وترابيزتين واحدة منهم عليها أسلحة دمار شامل زي مضرب بيسبول وعتلة وأنبوبة معدنية ومفتاح انجليزي، والتانية عليها الضحايا من زجاجات مياه وقطع من الفخار، وكمان شاشات تليفزيون وكمبيوتر. أقصى عدد مسموح بيه في الغرفة هو فردين، وفي ناس بتفضل إنها تدخل لوحدها.

بدأنا واحد ورا التاني نسيب متعلقاتنا على البرميل وبعدين بدأنا نستخدم رحلة التكسير وتحويل كل حاجة لفتافيت. الزجاجات تحولت لقطع زجاج لا ترى بالعين المجردة، والفخار لتراب أحمر والتليفزيون عبارة عن هيكل فاضي خالص؛ يمكن بس شاشة الكمبيوتر هي اللي فلتت من تحت سيطرتنا.

خلصت الحرب بعد حوالي نص ساعة، وبعدها سلمنا على الكاميرا ورجعنا لمكان الأدوات عشان نرجعهم ونسترد متعلقاتنا. بصراحة التجربة عبقرية وبتركز على إنك تخرج غضبك على حاجة معينة بتكسرها وتطلع فيها كل نرفزتك وعصبيتك، وفي الأخر بتخرج وأنت مرتاح البال.

في الأخر خالص أخذنا رقم سري نشوف بيه الفيديو بتاعنا على صفحة أنليشد على يوتيوب وصور زي اللي بيصوروها للمجرمين بتنزل على صفحتهم على فيس بوك كل يوم خميس.

أنليشد بيقدم طريقة أكتر من هايلة للتنفيس عن غضبنا وزعلنا بطريقة مرحة لطيفة. الفكرة كمان إن الناس هناك هايلين والمفروض إنهم هيعملوا أفكار جديدة قريب، وإحنا عن نفسنا منتظرين على نار عشان نشوف الجديد عندهم.