The Definitive Guide to Living in the Capital , Cairo , Egypt

رنا شرف

مصدر الصور: ويكيبيديا (الصورة الرئيسية لمسجد أحمد بن طولون، والصورة الداخلية لبيت الكرتلية)

السيدة زينب حي عريق في القاهرة، فيه أماكن تاريخية مميزة، وكل ركن في الحي بيحكي حكايات عن تاريخ القاهرة وناسها الطيبين، ولو كنت من عشاق الأماكن التاريخية والشعبية، يبقى أكيد هتحب حي السيدة زينب، بكل تفاصيله وأبعاده التاريخية والثقافية والدينية.

تعالوا نعرف إزاي نقضي يوم مبهج وجميل في السيدة زينب.

في الصباح

ننصحك توصل السيدة زينب الصبح بدري، وممكن توصل للحي العريق عن طريق مترو الأنفاق، وتنزل محطة السيدة، وتبدأ يومك هناك بالإفطار، وطبعًا مش هنفطر غير في مكان حلو يحسسنا بجو السيدة زينب، وإحنا بنرشح لك مطعم الجحش، اللي بيقدم أحلى فول وفلافل واللذي منه.

بعد الإفطار هنبدأ الرحلة، في البداية جميل أنك تزور متحف بيت الكرتلية، اللي بيتكون من 29 قاعة بتجسد مختلف الحضارات، ومنها الهندية والفارسية والصينية وغيرها. بيت الكرتلية كان بيت لطبيب إنجليزي اسمه جاير أندرسون، وبمرور السنين قامت الحكومة بترميمه وبقى مزار تاريخي وثقافي.

ولو بتحب الأجواء الدينية والروحانية يبقي لازم تزور مسجد السيدة زينب، المليان بالروحانيات والأجواء الدينية الجميلة، والمصريين مرتبطين به بسبب عشقهم للسيدة زينب رضى الله عنها.

تقدر كمان تزور مسجد أحمد بن طولون، والمسجد ده له بعد ديني وتاريخي جميل، وهو من أقدم مساجد القاهرة، وبيتميز بنموذج العمارة الفني المميز.

في المساء

بعد الفسحة الجميلة هحتاج نأكل، علشان كدة هنروح نتغدا أحلى حلويات، والحلويات اللي نقصدها مش كيك ولا جاتوه ولا حتى بسبوسة، بنتكلم عن الممبار والكوارع واللذي منه، علشان كدة هنطلع على مطعم “حبايب السيدة”، لكن لو مالكش في العظمة دي، يبقة ممكن تختار تتغدا كبدة وجمبري ومخ عند مطعم “الشرقاوي”.

بعد الغداء هنحتاج نحلي، ومافيش أجمل من زيارة سريعة لسوبيا توتو أو سوبيا الرحماني.