The Definitive Guide to Living in the Capital , Cairo , Egypt

على الرغم من أن البعض ممكن يفتكروا أن البلاي ستيشن جهاز للأطفال بس، لكن الحقيقة أن الألعاب اللي بيقدمها الجهاز بتتجاوز فكرة أنها مجرد ألعاب للصغار، علشان تقدم في النهاية تجربة لا تنتهي من المتعة والأبهار للشباب من الجنسين ومن كافة الأعمار والخلفيات الثقافية والاجتماعية.

موضوعنا النهارده هيتناول مجموعة من أشهر وأحلى العاب البلاي ستيشن على مر تاريخ الجهاز، وكلها ألعاب متاحة في الأسواق المصرية والعربية… تعالوا نشوف كايرو 360 بتلعب إيه على البلاي ستيشن!

Fifa17 و PES2017

مش بس واحدة من أشهر ألعاب كرة القدم في مصر أو المنطقة العربية، الحقيقة أن لعبة فيفا هي أشهر لعبة على مستوى العالم فيما يتعلق بالألعاب الإلكترونية الرياضية وطبعًا بتقاسمها المكانة لعبة PES واللي بتقوم معارك كبيرة بين المتعصبين ومحبي كل لعبة اللي بينهم منافسة كبيرة.

اللعبتين قادرتين على أنهم ينقلوا اللاعب لعالم الأستادات ومباريات كرة القدم المهمة، وبتوفر عدة أنماط من اللعب منها طبعًا اللعب الزوجي بين لاعبين. وده ممكن يضيع ساعات من الوقت في تحديات بين اللاعبين واختياراتهم للفرق.

Call of Duty و Battlefield

لعبتين من أشهر ألعاب إطلاق النار أو First man shooter وكلا اللعبتين بيقدموا عدة أنماط من اللعب، واللعبة فيهم عبارة عن مغامرة رجل وسط سلسلة لا تنتهي من التحديات والأعداء اللي المفروض عليه يقتلهم أو يتغلب عليهم، بالأضافة لعدد كبير من المهمات واللعب من خلال الأنترنت واللي بيقدم سلسلة لا تتوقف من التحديات على مدار الساعة.

اللعبتين برضه عليهم اختلاف كبير ومنافسة شرسة وخناقات بتحصل بين محبي كل لعبة منهم، لكن في رأينا أن أي لعبة منهم كفيلة أنها تروي عطش أي شخص محب لألعاب إطلاق النار والمهمات والتحديات.

GTA

واحدة من أشهر ألعاب العالم المفتوح Open world بمعنى أن اللاعب بيكون حر أنه يتصرف براحته في اللعبة ومش محدد بتنفيذ مهام أو التغلب على أعداء معينين، إلا لو حب هو يلزم نفسه بالعمل على واحدة من المهمات الممتعة اللي في اللعبة.

لكن بيعيب سلسلة ألعاب GTA نسبة العنف الكبيرة فيها ودمويتها اللي بتجعل تصنيفها دائما +18 بمعنى أنها غير مناسبة للأطفال.

Tom Clancy’s Splinter Cell

من الألعاب الاستراتيجية اللي بتحتاج مستوى كبير من الذكاء علشان يقدر اللاعب يحل ألغازها ويوصل فيها لحلول صحيحة. لكن في المقابل بتخلي اللاعب يشعر بالذكاء والقدرة على التفوق من خلال سلسلة من المهمات اللي بيقوم بيها عميل القوات الخاصة (توم كلانسي) واللي بيفك أعقد الألغاز في العالم المعاصر.

اللعبة بتمتاز بنسبة عالية من الدقة والواقعية، وبتترك الحرية للاعب أنه ياخد بنفسه قرارات ممكن تغير خط سير اللعبة بالكامل.

Uncharted

سلسلة من الألعاب اللي بتجمع بين أكتر من أسلوب في اللعب، ما بين إطلاق النار أو الجزء الاستراتيجي واللي بيتيح للاعب أنماط مختلفة وممتعة جدًا لممارسة اللعبة بالشكل اللي يحبوه.

لعبة Uncharted واحدة من أكتر وأهم الألعاب اللي بتحصد اهتمام اللاعبين على مستوى العالم، وفى مصر بيحبها عدد كبير من عشاق الألعاب، لإنها بتجمع بين أكتر من أسلوب في تنفيذ المهام المختلفة والقيام بها بشكل ناجح في النهاية.