The Definitive Guide to Living in the Capital , Cairo , Egypt

القاهرة حلوة مافيش كلام، بخروجاتها بسهراتها بأماكن كتيرة تقدر تروحها وتنبسط فيها. لكن زي ما بيقولوا الحلو مايكملش، مانقدرش ننكر إن القاهرة فيها حاجات بتضايقنا أحيانًا. ونتمنى تكون مش موجودة. إحنا لخصنا كام مشكلة كده، لو حصل واتخلصنا منهم، القاهرة دي هتبقى جنة على الأرض.. هتبقى المدينة الفاضلة:

1- الزحمة

لازم تكون دي أول حاجة نتكلم عنها، والكلام عنها مايخلصش الصراحة. تقريبًا إحنا البلد الوحيدة اللي بتنزل فيها قبل ميعادك بحوالي ساعتين مثلًا، وبرضه ممكن تتأخر. إحنا بنقضي تقريبًا تلت حياتنا على الدائري والمحور، ده غير الإشارات اللي في كل حتة حضرتك.

2- المواصلات

لو مش معاك عربية وزينا واخدها كعب داير على المواصلات، فانت أكيد فاهم. المواصلات نفسها من جوة زحمة، وتبقى محظوظ لو لقيت مكان تقعد. وهاتك يا خناق مع السواقين على الأجرة. ويا سلام على المترو بقى، حدث ولا حرج، كأنك في يوم الحشر. علبة سردينة بشرية بتتحرك تحت الأرض. وبتبقى أحلى شواية في الصيف.

3- التحرش

إحنا كشعب متدين بطبعه، لو شوفنا ولد وبنت مع بعض في أي مكان، لازم نعملهم أحلى زفة. وهاتك يا تريقة واشتغالات. إنما لو واحد اتحرش بواحدة في الشارع.. لأ معلش، هي إيه اللي ملبسها كده؟ وإيه اللي وداها هناك؟ النظام نظام.

4- روتين المصالح الحكومية

إمتى بقى نخلص من الإمضاء بتاعت مدام “اعتشماد” اللي في الرابع؟ أو الدمغة بتاعت الحجة سعاد في تالت مكتب على الشمال؟ ليه المصلحة اللي بتخلص في مجمع التحرير مثلًا محتاجة يوم أجازة من الشغل؟ ده على أقل تقدير كمان. ولا “الشاي” اللي لازم يشربه الموظف علشان يمضي ورقة في أي مكان. ويا سلام بقى لو الاستاذ فلان قام يصلي الظهر من حوالي ساعتين. إحنا عمرنا بيضيع مع الناس دي فعليًا.

5- الزبالة في الشوارع

تقريبًا الزبالة بقت أكتر من البشر في الشوارع. في كل ركن، تحت أي كوبري، في أي شارع جانبي، هتلاقي كميات مهولة من الزبالة. بجد بجد لازم الناس تتعود ترمي الزبالة بتاعتها في الصناديق المخصصة لكده. بدل ما بقينا بندور على الشوارع وسط الزباله يا بيه.

6- التطفل

دي ماحدش فينا ماجربهاش. لو في المترو وماسك موبايلك، هتلاقي اللي باصصلك فيه. واحتمال يقولك هات حاجة تانية علشان زهقت من ده. ولا سواق التاكسي مثلًا اللي تركب معاه يفضل يسألك، متجوز؟ طب ليه؟ موبايلك ده بكام؟ في كاميرا؟ وانت بقى بتشتغل إيه؟ في كل مكان لازم يطلعلك حد من حيث لا تدري، ويفضل فاتح معاك تحقيق ولا كأنه حماتك. ارحمونا بقى.

7- الميكروباصات والتكاتك

لو معاك عربية أو ماشي على رجليك، انت كده كده هتكون ضحية لأي ميكروباص أو توكتوك، يكسر عليك، أو يمشي عكسي، أو الاتنين مع بعض ويشتمك على أساس إن انت اللي غلطان. تحسهم ماشيين في الشارع يدوروا على حد يبهدلوه، مش علشان يشتغلوا.

8- وقفة النواصي

وما أدراك ما وقفة النواصي في الشوارع الجانبية، ودي كابوس أي بنت معدية من المكان ده. معاكسة وبحلقة وكلام مش مريح. كأنها ضريبة بتدفعها أي بنت علشان تعدي. شخلل علشان تعدي يا بلدينا.

نفسنا نرتاح وننبسط  بقى.