The Definitive Guide to Living in the Capital , Cairo , Egypt

رنا شرف

الجو الأيام دي جميل، صحيح فيه لسعة برد بس الشمس لسة مصاحبانا ومالية القاهرة سعادة وبهجة، وبما إن الويك أند هو فرصتنا الحقيقية للخروج والانبساط، جبنا لكم 5 خروجات للويك إند علي قد الإيد.

مولات القاهرة

لو حابب الجو بتاع المولات والأضواء الكتير والمحلات اللي فيها كل أنواع المنتجات تقريبًا، مع جو دافئ جدًا، وسط زحمة الناس المبهجة، ننصحك تروح أي مول قريب منك من مولات القاهرة، زي سيتي ستارز ومول مصر ومول كايرو فيستفال، وغيرهم.

المول خروجة حلوة وعلى قد الإيد، ومش لازم تشتري أي حاجة، انبسط وبس.

وسط البلد

وسط البلد خروجة ماتتنسيش، عندك مثلًا التمشية الجميلة وأنت بتاكل آيس كريم من العبد، وتتمشى بعدها أو تشرب عصير من فواكه سليمان باشا، أو تأكل سندوتش شاورمة من أبو مازن مثلًا. وسط البلد حالة حلوة، والتمشية فيها متعة حقيقية.

سينمات القاهرة

القاهرة عاصمة السينما في مصر والعالم العربي، فيها عدد كبير من السينمات، وفيها سينمات رخيصة كتير، زي سينما صن سيتي اللي سعر تذكرتها 60 جنيه للحفلا الصباحية، وسينمات شارع عماد الدين، وحتى سينما الزمالك.

حديقة الحيوانات

من الحدائق الجميلة في الجيزة، واللي سعر تذكرتها رخيص جدًا، وفعلًا الحديقة مبهجة ومصدر فرحة سواء للأطفال أوللكبار. سعر التذكرة 5 جنيه يعني في متناول الجميع.

كوبري قصر النيل

لو بتحب الانطلاق والوقوف علي كوبري تاريخي جميل في الهواء، يبقي كوبري قصر النيل هيعجبك. هناك هتستمتع بدوشة زوار وسط البلد، وهتشوف مناظر جميلة لبواخر في النيل فيها رقص وأغاني، وممكن تتصور صور جميلة برضه.

وأخيرًا..

بنتمنى ويك إند سعيد لكل سكان القاهرة الجميلة المجنونة.