The Definitive Guide to Living in the Capital , Cairo , Egypt

على الرغم من إننا ماشوفناش أعمال كتير من السينما الفنلندية، لكن التجارب القليلة اللي شوفناها عجبتنا، وده خلى انطباعنا عن السينما دي إيجابي بشكل ما. من فترة شوفنا فيلم TROLL اللي نقدر نقول إنه النسخة الفنلندية من كينج كونج (بصناعة نتفليكسية) وشوفنا قبل كده فيلم الرعب The Twin وفيلم الأنيميشن The Angry Birds Movie.. والحقيقة أن كلها كانت تجارب موفقة وتحترم. لكن فيلمSisu  رايح لمنطقة تانية خالص، ليه؟ هنشوف في السطور الجاية.

في البداية، الفيلم بيعرفنا أن كلمة Sisu هي كلمة فنلندية مالهاش ترجمة دقيقة في اللغات التانية، ومعناها عمل شجاع أو بطولي بشكل لا يصدقه عقل. وهو ده المدخل اللي بيمهد من خلاله المخرج والمؤلف جالماري هيلاندر المشاهدين أنهم هيشوفوا فيلم فيه أمور غرائبية لا يصدقها عقل. وده اللي حصل فعلًا.

بطل الفيلم، اللي مش بينطق غير جملة واحدة في الفيلم كله، هو رجل وحيد مع الكلب بتاعه، بيعمل في التنقيب عن الذهب، وبعد طول معاناة بيوصل لكمية كبيرة منه. لكن في طريق عودته، بيصادف كتيبة من النازيين، اللي بيغادروا فنلندا مع اقتراب خسارة ألمانيا للحرب العالمية الثانية، ومع اتباعهم لسياسة الأرض المحروقة، اللي بتقضي بضرورة تدمير وتخريب أي مكان بينسحبوا منه علشان يمنعوا أهله من الاستفادة منه في المستقبل، بيقرر الألمان تدمير كل شيء، وده بيدخلهم في مواجهة مع بطلنا، اللي بنكتشف أنه بطل لا يشق له غبار، وأسطورة حقيقية في الكفاح ضد الروس، ودلوقت في الحرب ضد الألمان.

بطل الفيلم جورما توميلا وعلى الرغم من تقدمه في السن قدر يقدم أداء أكشن غير تقليدي، ودي حاجة تحسب له، ومع وجود كلبه معاه، حسينا أننا أمام فيلم عن جد جون ويك، لأن التشابه بين Sisu وبين سلسلة John wick تشابه كبير جدًا، في فكرة الفرد ضد المجموعة، وفي فكرة الأعمال الخارقة للطبيعة، والقدرة غير العادية في البقاء على قيد الحياة.

لكن مخرج Sisu أخد فكرة الأعمال الخارقة دي لمستوى تاني خالص، يعني بنشوف مشهد لكتيبة كاملة بتفتح النار من مسافة قريبة على البطل، وهو بيصد الرصاص بطريقة بدائية غير قابلة للتصديق. بنشوف مشهد تحطم طائرة بيخرج منه البطل بدون خدوش تقريبًا مع أنه أبعد ما يكون عن المنطق، وألف مشهد تاني مش عاوزين نحرقه عليكم، نقدر نقول إن المنطق بينتحر لما يشوفهم!

لكن من ناحية تانية، مش هي دي السينما؟! مش هي القدرة على إقناع المشاهدين بما لا يمكن الاقتناع بيه؟! مش كلنا بنتفرج على الفيلم في السينما وإحنا عارفين أن دول ممثلين بياخدوا أجر علشان يضحكوا علينا؟! ليه مش كتير من الناس عاجبهم المبالغة في Sisu على الرغم من أن نفس المبالغات تقريبًا موجودة في جون ويك؟

الإجابة هنا هي الإخراج، المخرج جالماري هيلاندر ماعرفش يعمل “تعاقد” جيد مع المشاهد فيما يتعلق بقدرة البطل على البقاء، بينما قدر صناع سلسلة جون ويك، على سبيل المثال، إنهم يعملوا “تعاقد” معانا على أن البدلة اللي لابسها جون في الفيلم مضادة للرصاص، بالتالي بنتفهم لما بنشوفه بينضرب بالنار ومش بيموت، مع أن مش دي طريقة عمل القمصان الواقية للرصاص خالص ولا دي قدراتها الحقيقية على أرض الواقع.

الخلاصة؛ فيلم Sisu فيلم مسلي جدًا لمحبي أفلام الأكشن، وننصحهم بمشاهدته، إلا لو كان عندهم مشكلة مع المبالغات الشديدة، أو المشاهدين اللي عندهم مشكلة مع المحتوى الصادم والعنيف والدموي، لأن الفيلم فيه كتير من المشاهد اللي من النوعية دي.