The Definitive Guide to Living in the Capital , Cairo , Egypt

سينمات القاهرة هتعرض من النهارده الجزء الأحدث من واحدة من أهم وأفضل سلاسل أفلام الأكشن والجاسوسية في تاريخ هوليوود. Mission Impossible السلسلة اللي بيتابعها الملايين حوالين العالم، واللي بيعتبر كل جزء جديد منها بمثابة فيلم مضمون النجاح في واحدة من أكتر سلاسل الأفلام قدرة على الأستمرار وتحقيق الأرباح في نفس الوقت.

لكن اللي مش كل الناس عارفاه أن سلسلة Mission Impossible بدأت كسلسلة من الحلقات في مسلسل تليفزيوني حقق شهرة واسعة جدًا نتيجة اعتماد تصويره على التقنيات الحديثة أيامها. طبعًا لما بنتكلم عن التقنيات الحديثة سنة 1966 يعني كل اللي ظهر في المسلسل أيامها تحول لبديهيات في عصرنا الحالي.

لكن مع نجاح المسلسل أيامها واستمرار عرضه لسنوات طويلة، تم تقديم الجزء الأول من السلسلة كفيلم سنة 1996 وده التاريخ اللي ناس كتير فاكراه كويس لأنه توقيت عرض الجزء الأول في مصر، واللي حقق نجاح رهيب بمشهد إيثان هانت عميل المخابرات الأمريكية وعضو فريق (المهمة المستحيلة) وهو متعلق في حبل علشان يخترق كمبيوتر مهم ومؤمن بشكل مستحيل حد يخترقه.

ومن هنا جاء أسم السلسلة واللي بتتناول في كل جزء منها مهمة مستحيلة بيقوم بيها فريق بيتم اختياره بعنايه بقيادة توم كروز أو إيثان هانت واللي بيقوم في كل جزء باقتحام مكان مستحيل اقتحامه أو الدخول في عداء مع مؤسسات تجسس وأرهاب دولية لا يمكن لشخص واحده أنه يتحداها.

مع نجاح الجزء الأول تم تقديم جزء ثاني في سنة 2000 ثم جزء ثالث سنة 2006 ومن هنا بدأت السلسلة تاخد شكل واضح ومعايير ثابتة للنجاح.

من أهم المعايير دي الموسيقى التصويرية المميزة واللي بيتم تطويرها في كل جزء بيتم تقديمه علشان تبقى أحلى من الجزء السابق، لكن الموسيقى الخاصة بالجزء الأول الأصلية تظل الأفضل وليها وضع خاص عند عشاق السلسلة.

أما على صعيد السيناريو أصبحت أفكار زي الأجهزة الحديثة وماسكات التنكر والأجهزة اللي بتغير شكل الوجه والصوت من الثوابت اللي بيتم تقديمها في كل جزء برضه.

ومؤخرًا بدأنا نلاحظ حاجتين مهمين وجداد على السلسلة. الأول هي أن الأجزاء الجديدة من السلسلة بيطلق عليها أسماء بدل ما كانت مجرد أرقام للأجزاء. وده لاحظناه من الجزء الرابع اللي تم تقديمه سنة 2011 بعنوان Mission: Impossible – Ghost Protocol والجزء الخامس بعنوان Mission: Impossible – Rogue Nation واللي تم تقديمه في 2015.

وفي الجزء ده لاحظنا أن السلسلة رايحة في اتجاه فلسفي عميق، وده على العكس من باقي الأجزاء اللي كانت أسهل في الفهم وكان البعض بيتهمها بالتفاهة أو الميل لتقديم الأكشن للأكشن وخلاص. لكن بداية من الجزء الخامس بدأت السلسلة تكون أشبه بسلاسل أفلام جيمس بوند من حيث الجمل الحوارية العميقة الطويلة وغيرها من الأمور.

السؤال اللي بيطرح نفسه دلوقتي.. ياتري هيكون إيه شكل أحدث أجزاء السلسلة اللي بيتم تقديمه بعنوان Mission: Impossible – Fallout وبيتم طرحه في السينمات المصرية في وقت متقارب مع السينمات الأمريكية؟ وهل هيقدر إيثان هانت أو توم كروز أنه يستمر في النجاح للمرة السادسة على التوالي؟ هنتفرج على الفيلم في اسرع وقت ونرجع لكم بريفيو عنه.