The Definitive Guide to Living in the Capital , Cairo , Egypt

على الرغم من أن قصة مجموعة الأشخاص اللي بيتعرضوا للأحتجاز في غرفة أو مكان مغلق ولازم يستغلوا ذكائهم للخروج منها تعتبر من القصص المكررة اللي شوفناها في أفلام وأعمال فنية كتير. لكن لسه الحبكة دي قادرة على جذب المزيد من الجمهور لو اتنفذت بطريقة فنية متقنة.

المخرج آدم روبيتيل قدر يلعب على قصة مكررة نوعًا ما علشان يقدم فيلمه Escape Room  بإسلوب ذكي وبطريقة مختلفة. الفيلم بيحكي عن مجموعة من الأشخاص بيتم احتجازهم في غرفة مغلقة. وكل هدفهم هو الخروج من الغرفة وهم على قيد الحياة.

الأداء التمثيلي لأبطال الفيلم تايلور راسل ولوغان ميلر وديبورا آن وول قدموا أداء تمثيلي قوي ومتميز. وقدروا يقنعونا بالورطة اللي واقعين فيها بشكل واقعي. وساعدهم على ده السيناريو اللي تتبع كل الحلول والأفكار المنطقية اللي ممكن تراود أي شخص وقع في نفس الموقف الصعب.

الديكورات كانت واحدة من عناصر قوة الفيلم وقدرت تقنعنا بالأحداث. كمان التلاعب بالإضاءة واختيار زوايا التصوير قدر يدخلنا في المود العام ويخلينا نتخيل لو كنا في نفس الموقف كان ممكن نتصرف إزاي.

لو كنت من محبي أفلام الخروج من الغرف والأماكن المغلقة اللي فيها أفخاخ قاتلة. فيلم Escape Room هايكون مناسب لك. مع العلم أن الفيلم ممكن يكون غير مناسب للمشاهدين اللي بيخافوا من مشاهد الرعب المكثف أو اللي عندهم فوبيا الأماكن المغلقة.

علشان تبقى عارف: تقييم الفيلم على موقع IMDb هو 6.4 من 10.