The Definitive Guide to Living in the Capital , Cairo , Egypt

مؤخرًا أفلام كتير كانت بتنافس على لقب أقوى فيلم في 2018. علشان كده قررنا نجمع لكم في التقرير ده أقوى 5 أفلام عربية شوفناها في 2018:

1- البدلة

واحد من أقوى الأفلام الكوميدية اللي شوفناها في 2018. مقتبس عن فيلم أجنبي بنفس الفكرة. في الفيلم بنشوف أكرم حسني وتامر حسني دور شابين، بيتقمصوا دور ضباط شرطة. الأمر اللي بيدخلهم في سلسلة لا تنتهي من المواقف الكوميدية.

الفيلم إخراج محمد جمال العدل، وتأليف أيمن بهجت قمر، وفكرة تامر حسني.

2- حرب كرموز

المميز في فيلم حرب كرموز مش بس جرعة الأكشن اللي فيه. لكن كمية الاهتمام بالتفاصيل التاريخية والواقعية. كلها كانت من عناصر قوة الفيلم. بنشوف أمير كرارة في دور ضابط شرطة مصري، بيرفض تسليم متهمين مصريين للسلطات الإنجليزية. الفيلم من تأليف محمد السبكي وإخراج بيتر ميمي.

3- تراب الماس

من أهم عوامل قوة الفيلم، هي اقتباسه عن رواية شهيرة للكاتب أحمد مراد، بتحمل نفس الاسم. بتحكي قصة الصيدلي طه الزهار “أسر ياسين”، اللي بيحاول ينتقم من اللي قتلوا والده، بمساعدة ضابط شرطة فاسد “ماجد الكدواني”. الفيلم من إخراج مروان حامد.

4- عيار ناري

من تأليف هيثم دبور وإخراج كريم الشناوي، بنشوف طبيب شرعي “أحمد الفيشاوي”، بيحاول يحل لغز وجود جثة مقتولة بالرصاص، بين جثث مصادمات المتظاهرين وقوات الأمن، في أحداث يناير. ومع تسرب التقرير للصحافة بتتطور الأحداث.

5- يوم الدين

ولأننا نحب نسيب الأحلى دايما للآخر. في رأينا أن (يوم الدين) هو الأفضل في 2018 على الإطلاق. الفيلم بيحكي عن رحلة رجل اسمه “بشاي” مصاب بالجذام. بيخرج من مستعمرة الجذام، ويبدأ رحلة في أنحاء مصر، علشان يدور على أهله. الفيلم حقق نجاح نقدي وجماهيري كبير. ووقع عليه الاختيار يمثل مصر في مهرجان كان 2018. الفيلم من تأليف وإخراج  أبو بكر شوقي.