The Definitive Guide to Living in the Capital , Cairo , Egypt

الفوبيا هي الخوف المرضي من أشياء مش مخيفة بطبيعتها.. زي فوبيا الأماكن المرتفعة أو الغرف المغلقة أو حتى الفوبيا من الظلام.

ومن بين كل تيمات الأفلام المرعبة بتعتبر تيمة فوبيا الغرف المغلقة اللي فيها أسرار أو أشباح أو أرواح هائمة، واحدة من أشهر التيمات اللي تم اللعب عليها في أفلام الرعب في العصر الحديث.. ومهما كانت درجة الرعب في الفيلم.. المشاهدين حول العالم مش هيبطلوا يقطعوا تذكرة ويتفرجوا على فيلم جديد بتدور أحداثه في غرفة بتحمل أسرار فظيعة.

فيلم The Disappointments Room من إخراج دي جي كاروسو، ومن بطولة كيت بيكنسيل، ميل رادو، ولوكاس تل، ومن تأليف  وينتوورث ميلر ودى.جى كاروسو.

الفيلم بيحكي عن زوجة شابة وابنها بينتقلوا لمنزل جديد وساحر.. وبيحسوا أن الحياة هتبتسم لهم أخيرًا.. لكن المنزل الجديد اللي انتقلوا له بيحمل داخله سر رهيب. من خلال غرفة مخفية داخل أروقة المنزل… وبتبدأ سلسلة من الأحداث الغريبة والمرعبة في الحدوث.

المميز في الفيلم كان أسلوب التصوير المعتمد على الرعب القائم على المفاجأة، وعلى الظهور المفاجئ للأشخاص والأشياء.. كمان المؤثرات الصوتية لعبت دور مهم جدًا في تميز الرعب في الفيلم، وخاصة صوت الصرير من الأبواب القديمة وغيرها من المؤثرات الصوتية المميزة.

الفيلم -من وجهة نظرنا- فشل في التجديد على تيمة الرعب القائم على الغرف المغلقة، وماقدرش يقدم جديد على مستوي السيناريو والحوار، أما القصة فعيبها إن الرعب الحقيقي في الفيلم مش بيبدأ غير بعد منتصف الفيلم تقريبًا.. وده أصابنا ببعض الملل واللي المفروض ما نشعرش به في فيلم رعب أبدًا.

على الرغم من كون The Disappointments Room مش أفضل فيلم رعب شوفناه في حياتنا، لكنه يظل فيلم يستحق المشاهدة لمحبي أفلام الغموض والرعب.