5 أسباب وجيهة مخليانا في انتظار فيلم واحد تاني
أحمد حلمي المؤلف هيثم دبور سينمات القاهرة فيلم أحمد حلمي الجديد فيلم واحد تاني معلومات عن فيلم واحد تاني موسم أفلام عيد الفطر
Cairo 360
والله لسه بدري ياشهر الصيام! من أيام قليلة جدًا كنا بنحكي معاكم عن مسلسل الاختيار 3 وأحمد مكي في الكبير 6 ، والأيام جريت بسرعة ولقينا نفسنا بنقدم لكم دليل لأفلام عيد الفطر ٢٠٢٢.
لكن من بين كل أفلام عيد الفطر، لقينا نفسنا بنعد الأيام علشان نتفرج على فيلم (واحد تاني) بشكل خاص. تعالوا نعرفكم على 5 أسباب مخليانا منتظرين فيلم (واحد تاني) من بين كل أفلام موسم عيد الفطر 2022.
بنحب السيما!
طبعًا مشاهدة المسلسلات لها رونقها الخاص. لكن مين قال إن السينما مالهاش سحرها المميز؟ لمدة شهر كامل (شهر رمضان) ماقدرناش ندخل السينما. وساعاتنا كانت مظبوطة على مواعيد عرض المسلسلات. جه الوقت علشان ناخد جرعة مركزة مكثفة من الكوميديا والتمثيل الجميل والإخراج المميز لمدة ساعة ونص أو ساعتين في قاعة عرض وشاشة كبيرة.. ودي في حد ذاتها مناسبة تستحق الاحتفال.
قصة فيلم (واحد تاني) بتنتمي لعالم الفانتازيا زي ماهو واضح من الإعلان. وواضح أن حلمي بيجسد شخصية شاب بيتعرض لتجربة استثنائية بتخليه (واحد تاني) فعليًا. ومنطقة الفانتازيا اللي بتلعب فيها القصة مش بنشوف أفلام عربي كتير عنها. ومع تأليف هيثم دبور للفيلم، بنتوقع نشوف عمل استثنائي.. دبور مؤلف أفلام زي عيار ناري ووقفة رجالة وغيرها.
أحمد حلمي
لسنين طويلة، كانت أفلام أحمد حلمي هي (العيدية) الجميلة اللي بتخلي العيد أحلى. حلمي عامل اتفاق غير مكتوب مع قطاع واسع من الجمهور، أنه يقدم كوميديا خفيفة سهلة الهضم، تحترم العقل، وصالحة للمشاهدة من كل أفراد الأسرة. معادلة مش بيخرج عنها غير في حالات نادرة. وده خلاه دايمًا مرتبط في أذهان الجمهور بموسم العيد اللي السينما بتكون خروجه أساسية فيه.
فريق العمل
أحمد حلمي بيعرف يجمع حواليه مجموعة نجوم مميزة، ويستفيد بخبرة ومساحة كل واحد من النجوم اللي معاه. وفي حالة (واحد تاني) بنتكلم عن نجوم بحجم روبي وسيد رجب وعمرو عبد الجليل ونسرين أمين وأحمد مالك.. يعني نقدر نقول أن الفيلم بيجمع من كل بستان زهرة. وده معناه أننا قدام معركة تمثيلية ضخمة، ونعتقد أن الفيلم مش هيكون كوميدي فقط، وهيكون له أبعاد تانية.
محمد شاكر خضير
كان ممكن (واحد تاني) يكون مجرد فيلم عيد تقليدي، لو ماكانش المخرج هو محمد شاكر خضير. علشان تعرفوا مدى تأثير خضير الفني، لكم أن تعرفوا أنه مخرج مسلسل (في كل أسبوع يوم جمعة)، و(جراند أوتيل) و(لا تطفيء الشمس) وغيرها من الأعمال القوية. خضير من الأسماء المميزة في الإخراج واللي أسمها على عمل بيعتبر إضافة كبيرة. فما بالكم بفيلم لأحمد حلمي.
4 معلومات سريعة عن الفيلم
1 – (واحد تاني) يعتبر عودة أحمد حلمي للسينما بعد فيلم (خيال مآتة) اللي اتعرض من ٣ سنين.
2 – الفيلم هو التعاون الأول بين أحمد حلمي من ناحية، وبين هيثم دبور مؤلفًا و محمد شاكر خضير مخرجًا من ناحية تانية.
3 – الفيلم كان اسمه (إكس)، ثم (العيل)، وأخيرًا استقروا على اسم (واحد تاني).
4 – (واحد تاني) هو أول تعاون بين أحمد حلمي وشركة سينرجي للإنتاج.
