كنيسة مارجرجس المستديرة في مصر القديمة.. حكاية أجمل كنائس مجمع الأديان
آثار قبطية السياحة الدينية العائلة المقدسة القاهرة التاريخية بابليون كنائس تاريخية كنائس مصر كنيسة مارجرجس مجمع الأديان مصر القديمة
Cairo 360
الصور: موقع شركة المقاولون العرب
وسط أجواء تاريخية وروحانية فريدة في مجمع الأديان بمصر القديمة، بتقف كنيسة مارجرجس المستديرة كواحدة من أقدم وأجمل الكنائس في مصر. الكنيسة المبنية فوق الحصن الروماني بابليون بتتميز بتصميم دائري نادر، وبتجمع بين الفن البيزنطي والتاريخ القبطي وروح المكان اللي عدت عليه حضارات وديانات مختلفة عبر قرون طويلة.
جمع الأديان بمصر القديمة منطقة ليها طابع فريد، لأنها بتجمع جوه مساحة صغيرة جدًا معابد وكنائس ومساجد من ديانات مختلفة، زي جامع عمرو بن العاص، أقدم مسجد في مصر، ومعبد بن عزرا اليهودي، وكمان الكنيسة المعلقة وكنيسة أبو سرجة.
لكن كنيسة مارجرجس ليها سحر خاص. الكنيسة دي اتبنت فوق بقايا الحصن الروماني بابليون اللي شيده الرومان في القرن التاني الميلادي بأمر من الإمبراطور تراجان، وعلشان كده شكلها مختلف عن أي كنيسة تانية في مصر.. دايرة! هي الكنيسة المستديرة الوحيدة في البلد، ومبنية على طراز بيجمع بين العمارة البيزنطية والرومانية.
اتأسست الكنيسة في القرن السابع الميلادي، واتعرضت على مر السنين لحرائق وترميمات كتير، لحد ما اتجددت بالكامل سنة 1904، ولسه لحد النهارده محافظة على عظمتها وجمالها.
من جوه، الكنيسة بتخطف العين بتفاصيلها الدقيقة؛ جدران مليانة أيقونات وقديسين، قبة عالية مرسوم فيها مشاهد فنية مبهرة، وسلالم حجرية بتوصل لبرج الأجراس اللي بيتقرع صوته في الأعياد والمناسبات.
اللي يزور الكنيسة هيلاحظ كمان وجود بئر قديم بيقول التقليد الكنسي إن العائلة المقدسة شربت منه وهي في مصر، والمكان هناك مفتوح للزيارة، وناس كتير بتيجي مخصوص علشان تشرب من الميه دي للتبرّك والدعاء.
الكنيسة جزء من دير مارجرجس الروماني التابع لبطريركية الإسكندرية للروم الأرثوذكس، وهي واحدة من 7 كنائس جوه مجمع الأديان وصفها المقريزي زمان بأنها “أجمل كنائس الحصن الروماني”.
زيارة الكنيسة تجربة مختلفة فعلًا، مش بس من الناحية الدينية، لكن كمان لأنها بتحكيلك تاريخ مصر من زاوية فنية ومعمارية وروحية في نفس الوقت.
عاوز تزور الكنيسة؟
تقدر تزور الكنيسة كل يوم من الصبح لحد العصر، والدخول مجاني. وأقرب محطة مترو هي مارجرجس، على بُعد دقايق من باب الكنيسة نفسه.
مقترح
معالم وسياحة
كنيسة مارجرجس المستديرة في مصر القديمة.. حكاية أجمل كنائس مجمع الأديان
آثار قبطية السياحة الدينية +8
فن وثقافة
