The Definitive Guide to Living in the Capital , Cairo , Egypt

الرحلات في مصر في الفترة الأخيرة والشباب المصري بقى عندهم طاقة جميلة قوي في الانطلاق لأماكن مختلفة وجديدة، الطاقة بقت تظهر في أنك بقى طبيعي جدًا تلاقي ولد/بنت واخد شنطة ظهره ومنطلق إلى رحلة للصحراء الغربية أو جبال سيناء أو جبال البحر الأحمر.

مع الأجواء الجميلة دي بقى عندنا مجموعات لتنظيم الرحلات وبنشوفهم مش بس مستقبل شركات سياحة متفوقة في مجالها، لأ دي كمان هتغير شكل السياحة الداخلية في مصر وتساعد المصريين في اكتشاف بلدهم الجميلة واللي ناس بتيجي لها من آخر الدنيا علشان تتفرج على الجمال المستخبي في كل حتة في مصر.

النهارده هنكلمكم عن مجموعة من أهم المجموعات وإحنا بنشوفهم أحسن ناس بينظموا رحلات في الوقت الحالي وهم (Escape)، من اسمهم (إسكيب) مش بس هتعطي لكم الفرصة أنكم تهربوا من ضوضاء وتلوث المدينة، كمان هتعطي لكم فرصة ونافذة جديدة على عالم جديد، والجميل أنكم ممكن تكتشفوا حاجة جديدة في حياتكم أو في نفسكم خلال الرحلة.

تجربتنا مع Escape  كانت في تسلق قمة جبل سانت كاثرين والـ Hike  (الترجل) في وادي إطلاح في منطقة كاترين والأنتخة في منطقة رأس شيطان، التجربة كانت رائعة وخصوصًا أنها ثاني مرة لتسلق جبل كاترين، قبل الرحلة كان فيه إجتماع مع أحمد فؤاد والشربيني ويحيي زكريا (مؤسسين ومن فريق Escape) علشان يوضحوا لنا تفاصيل الرحلة وإزاي نكون مستعدين ونختار ملابس ومعدات مناسبة لموضوع الرحلة ولو حد عنده أي أسئلة بخصوص الرحلة وتفاصيلها.

خلال رحلة الطلوع لقمة الجبل، المنظمين دائمًا حولنا ومقسمين نفسهم خلالنا ومركزين لو حد محتاج حاجة أو حد لاقدر الله حصل له شد عضلي أو إصابة أو غيره.

الجزء الثاني من الرحلة كان في المشي في وادي إطلاح وهو واحد من الأودية الجافة في منطقة كاترين (شبه وادي دجلة) والطريق عبارة أنكم بتمشوا خلال طريق كان بيجري فيه النهر والسيول لما بيكون وقتها، تجربة جميلة خصوصًا مع الشاي البدوي الجميل مع الحبق والأعشاب الحلوة، كمان هتلاقوا عيون مياه عذبة صالحة للشرب (طعمها مختلف ومميز جدًا)، الجزء الثالث كان الأنتخة ومياه خليج العقبة الرائعة في منطقة رأس شطان في مكان اسمه دايرة كامب وهو مكان إقامة Ecological  بيئي، فيه كهرباء وحمام ومياه متوفرة طول الوقت.

من خلال أصحابنا اللي طلعوا مع Escape  رحلات لمناطق مختلفة ما بين مناطق مختلفة في جنوب سيناء أو محميات طبيعية زي وادي الجمال في مرسى علم (البحر الأحمر) أو كهف وادي سنور أو واحة سيوة أو مناطق في الصحراء الغربية والبحر الأحمر وغيره وغيره، الكل اتفق على أشياء محددة، وهي أن فريق Escape  مش بيسيب حاجة للظروف يعني كل شيء منظم جدًا ومرتب، كمان الأمان مع Escape  أنتم في أمان بمعنى الكلمة، سواء كان في الوعي الطبي في التعامل مع أي (لا قدر الله) إصابة أو جرح او غيره، كمان وعي التعامل مع الطبيعة وإحترام الطبيعة والظروف اللي ممكن تحصل وده أكيد وراه تدريب وقراءة كويسين قوي، كمان المهم جدًا وعي التعامل في المواقف الصعبة والمشاكل الغير متوقعة اللي بتحتاج شخص متزن يقدر يحافظ على الناس اللي طالعة معاه في الرحلة ويرجعهم بسلام وكمان مبسوطين.

في الوقت اللي هتقرروا تطلعوا رحلة مع Escape  أنتم هتكونوا على ميعاد مع تجربة جديدة، تجربة ممكن تكتشفوا حاجة جديدة في نفسكم أو حتى تجربة تضيف لمعلوماتكم وتغير وجهة نظركم ناحية حاجات كثيرة قوي في الحياة والعالم اللي بنعيشه.

اعرفوا أكثر عن Escape ورحلاتهم من خلال صفحتهم على الفيسبوك.