The Definitive Guide to Living in the Capital , Cairo , Egypt

“وكأن جبال سيناء بـ تبوس البحر”، ده أبسط تعبير ممكن يتقال فى شكل البحر وعلاقته بجبال سيناء، وكأن العاملين هناك ما اجتهدوش -بقصد التعمد- لإظهار شكل الفنادق والـ Camps وعدم المبالغة فى صناعتها علشان تبقى على سنجة عشرة زى ما بـ يقولوا، علشان ما تلهيش العين عن رؤية المناظر الطبيعية، فندق Bedouin Moon أو القمر البدوى كان جزء من طبيعة دهب الساحرة ببساطتها المبالغ فيها لدرجة أنها أظهرته كأنه قطعة فنية.

ولأن أكثر الأشياء اللى بـ تشغلنا لما نحب نسافر اختيار المكان هـ نحاول نذكر أهم الحاجات اللى ممكن تهتم تسأل عنها:

Bedouin Moon واحد من فناق دهب اللى حاولوا يستغلوا الطبيعة بنسبة كبيرة ليظهروا المكان بشكل بسط وجميل في نفس الوقت، الفندق موجود فى شمال دهب في طريق (البلو هول Blue Hole) على بعد 20 دقيقة تقريبًا من محطة السوبر جيت.

موقعه على البحر مباشرة وعلى الرغم من كده فيه حمامين سباحة للكبار والأطفال وبار على عكس أغلب الفنادق اللى بـ تعتمد على النزول فى البحر فقط للعوم، بالإضافة أنه فى وسط الجبال، بمعنى أن فى وجه الفندق البحر وبـ تحاوطه من جميع الاتجاهات ثلاثة جبال، الفندق اعتمد على الطبيعة والبساطة في حاجات كثيرة منها وحدات الإضاءة كانت عبارة عن غطاء من الخوص وكأنها نجفة أو وحدات الزينة اللي مصنوعة بنفس الشكل تقريبًا والكراسى وحاجات كثير داخل الفندق مصنوعة بوحى من الطبيعة.

الفندق فيه 29 غرفة، نصفهم تقريبًا بـ يطل على البحر، الغرف كلها فيها وحدات تكييف وساحات خارجية، مساحتها كمان كويسة نقدر نقول مناسبة بـ تحتوى على ثلاجة صغيرة ودولاب والسراير مساحتها كبيرة، لكن للأسف مش موجود تليفزيون، لكن فيه إنترنت “Wi-Fi”، صحيح كان فيه مشكلة أغلب الوقت لكن كان موجود.

أسعار الغرف بـ تختلف حسب موقعها، كمان بـ تختلف من مصريين لأجانب، بالنسبة لأسعار الأجانب مش محددة، كمان عرفنا من إدارة الفندق أنها بـ تختلف من موسم للثاني، أما بالنسبة لأسعار  المصريين فالغرف المطلة على البحر زوجى بـ 300 جنيه لليوم الواحد، السعر شامل الإفطار والإقامة فقط، أما سعر الفردي فى غرفة على البحر بـ 200 جنيه شاملة الإفطار برضه، أما الغرف الداخلية المطلة على الجبال للزوجى 250 جنيه شاملة الإفطار، وفردي 150 جنيه شاملة الإفطار برضه لليوم.

الإفطار Open Buffet بـ يحتوى على بيض بأنواعه، بطاطس، جبنة، فول وفلافل، خيار، طماطم، وزبادى وأكثر من نوع للمشروبات زي النسكافيه، عصير البرتقال، لبن، شاى، وممكن تحلى بسلاطة فواكة اللى كانت معظم الوقت فريش.

الغداء كان خارج سعر الإقامة، لكن عندهم وجبات فى منيو شرقي وغربي بأسعار تبدأ من 50 جنيه إلى 200 جنيه للفرد الواحد فيها جميع أنواع السمك، اللحوم، الفراخ بسلاطات متنوعة.

بالنسبة لرحلات الفندق أسعارها بـ تختلف من موسم للثانى ولكن مش بـ تختلف كثير عن الأسعار الخارجية زي رحلة الـ Blue Hole، رحلة العشاء البدوى، رحلة جبل كاثرين، ركوب الجمل، السفارى، والسنوركلنج، و ألطف حاجة أن مسموح هناك باصطحاب الحيوانات الأليفة.

للأسف ممنوع الحجز بالتليفون إلا لو كنت نزيل قديم عندهم، وما تعتمدش على الأسعار اللى ذكرناها بنسبة كبيرة لأنها بـ تتفاوت من موسم لآخر ولكن بنسب بسيطة، لو عاوز تعرف معلومات أكثر عن فندق Bedouin Moon ممكن تدخل على موقعهم الإلكترونى، أو تبعت لهم على info@bedouinmoonhotel.com.