The Definitive Guide to Living in the Capital , Cairo , Egypt

زيهم زينا، ويمكن أكتر مننا، بيحاولو يعيشوا حياتهم بالطريقة اللي تسعدهم وتساعدهم في الوقت نفسه، طريقة تحسسهم بجد إنهم من أصحاب الهمم، مش مجرد أشخاص عاديين.

علشان كده كايرو 360 جابت لك 10 نصايح تساعدك لو كنت من أصحاب الهمم وانت في طريقك للسعادة في رحلة سفر ممتعة، علشان ماتخليش حاجه تنسيك إنك زيك زينا، ويمكن أحسن مننا:

1- اتصل بشركة الطيران والمطار لترتيب الإجراءات اللازمة، وتحديد طلباتك الخاصة وكل اللي هتحتاجه في رحلتك قبل معاد الرحلة بفترة، علشان يتوفرلك في الوقت المناسب.

2- خليك محدد وواضح في ذكر حالتك، أو حالة الشخص المسافر معاك لو كنت مرافق ليه، وقدم أكتر تفاصيل ومعلومات ممكنة عن الحاجات اللي يقدر أو ما يقدرش صاحب الهمه إنه يعملها.

3- اتكلم بالتفصيل مع دكتورك المشرف عن رحلتك، لإن هو أكتر حد يقدر يحدد معاك إذا كنت هتقدر تعمل ده أو لأ، وهيقدملك النصايح المهمة للتعامل في حالات الطوارئ.

4- احتفظ بروشته من دكتورك الخاص، بتوضح طبيعة حالتك والأدوية اللي هتحتاجها، والإجراءات اللازمة في حالات الطوارىء والمضاعفات المحتملة، واتأكد دايمًا إن يكون رقم تلفون الدكتور معاك طول الرحلة، علشان تتصل به عند اللزوم.

5- خلي معاك دايمًا كمية إضافية من الأدوية اللي بتستخدمها، وخليها في الشنطة اللي بتبقى معاك علطول، وبلاش تخليها مع الشنط اللي ممكن تضيع أو تتُسرق.

6- اتأكد دايمًا إن في دكاترة متخصصين وقادرين على فهم حالتك الصحية في البلد اللي انت رايح ليها، وتقدر تعرف ده من سفارة بلدك أو من الشركات اللي بتقدم خدمات التأمين الصحي.

7- حاول تدور على وكيل أو شركة سفر متميزة، لإن في بعض الوكلاء والئركات بتقدم خدمات خاصة، تراعي بعض الحالات زي ضعف السمع أو ضعف النمو.

8- ابعد على قد ما تقدر عن الرحلات غير المباشرة (الترانزيت) ، لإنها هتسببلك تعب وضغط زيادة، ده غير إجراءات نقل الكرسي المتحرك وغيرها من التجهيزات الطبية.

9- ما تنساش تأكد على إجراءات النقل من وإلى المطار، وتتأكد من إن في خدمة نقل مناسبة لأصحاب الهمم، سواء في بلدك أو البلد الي انت رايح ليها.

10- لو كنت بتستخدم كرسي متحرك، خلي معاك دايمًا قطع ليه أو المعدات الطبية اللي بتستخدمها، لإن احتمالية إن يحصل فيها مشكلة واردة في أي لحظة.

وأخيرًا، بنتملكم في كايرو 360 رحلة سعيدة وحياة أسعد.