The Definitive Guide to Living in the Capital , Cairo , Egypt

مصر مليانة أماكن جميلة، بس للأسف مافيش اهتمام بالأماكن دي سواء على مستوى الإعلام أو من المسئولين، صحيح عدم شهرة الأماكن دي هيديك إحساس أنك من أوائل الناس اللي زارت المكان واستمتعت به، بس في نفس الوقت بيبقى صعبان علينا أن العالم كله ما يشوفش الجمال اللي في مصر ده.. تعالوا نتعرف على أماكن جميلة مش هتصدق أنها موجودة في بلدنا.

أبو جالوم

محمية أبو جالوم مساحتها حوالي 400 كيلو متر مربع في سيناء، وبتروح لها بالجمال من ذهب في جنوب سيناء، عارفين لما تروحوا مكان وتحسوا أنكم من أوائل الناس اللي راحت هناك، أجمل شعب مرجانية ومناظر طبيعية من جبال مع  لون البحر، هتبقوا محتارين تغتطسوا ولا تتأملوا الطبيعة.

وادي الوشواش

في جنوب سيناء وفي بطن الصحراء حرفيًا، لأنك بتمشي بالعربية ثم على رجليك حوالي ساعتين من نويبع لحد ما توصل هناك.

هو عبارة عن وادي بتتجمع فيه بواقي السيول والأمطار لحد ما يكون زي حمام سباحة طبيعي كبير في بطن الجبل، مافيش جمال بعد كده!

وادي الجرندل

برضه في جنوب سيناء في راس صدر وفيه حيونات ونباتات كثيرة بطول الوادي واللي جماله نادر وبيمتد من 75 لـ 85 متر، وقريب من نفق الشهيد أحمد حمدي بحوالي 115.

محمية وادي الجمال

محمية موجودة في مرسى علم في منتهى الجمال وفيها أنواع نادرة من الحيوانات، غير أن محبي الغطس هيتسمتعوا جدًا هناك بالشعب المرجانية النادرة وعروس البحر اللي بترعاها المحمية، غير الجزء البري في المحمية اللي فيه نباتات وطيور نادرة جدًا. واتسمت المحمية باسم وادي الجمال علشان البدو كانوا بيلاقوا فيه الجمال التايهة واللي بتتغذى على النباتات الموجودة في المحمية.

Hurghada Grand Aquarium

مشروع مذهل حط مصر في مكانة فريدة في الشرق الأوسط وشمال أفرقيا، لأنه فيه أكثر من ميزة أكثرهم هي أنك بتمر بنفق وسط المياة، سواء العذبة أوالمالحة، بيخليك تتفرج على كل الحيوانات البحرية اللي تتخليها، غير طبعًا الجزء المكشوف أو الغابة اللي فيها كل الحيوانات اللي ممكن تتفاعل معاهم برضه.

Caves Beach Resort Hurghada

عيش كأنك في كهف Caves Beach Resort Hurghada، وده فندق مصمم على شكل كهوف من حجر الروك، هتحس فيه أنك عايش جوه كهف، وتعيش مغامرة رجل الكهف بس بطريقة مدنية شوية لأنه فندق في الأول أو في الآخر.

فندق "Adrère Amellal" فى واحة سيوة

لو عاوز تعيش تجربة أنك في الطبيعة بجد في قلب الصحراء، من غير كهرباء أو تكنولوجيا أو شبكة موبايل، جرب تروح أسبوع في الفندق ده في سيوة واللي بيقدم لك كل حاجة بتأكلها أو بتلمسها من الطبيعة، مشكلته الوحيدة أنه يعتبر من أغلى الفنادق في العالم وأغربهم.

محمية  كهف وادي السنور في بني سويف

أجمل أشكال للكهوف والتشكيلات الصخرية اللي تكونت عبر ملايين السنين، ومافيش زيها في العالم كله إلا في ولاية فرجينيا في الولايات المتحدة الأمريكية، وهي تبعد عن مدينة بني سويف بـ 70 كيلومتر بس. تجربة ما تتفوتش خاصة أنك هتفتكر كل أفلام الرعب اللي شفتها في حياتك بس الفرق أنك هتستمتع بجمال الطبيعة هناك.

غرب سهيل في النوبة

من أجمل الأماكن اللي ممكن تزورها في حياتك، وتستمتع فيها بجمال الطبيعة، وكنا كتبنا دليل شامل عن غرب سهيل فيه كل التفاصيل اللي هتحتاجها من أول تركب إيه وأسعار الأوتيلات لحد الأنشطة اللي هتعملها هناك.

الصحراء السوداء والبيضاء

عمرك شوفت صحراء سوداء أيوة سوداء وغنية بالمعادن اللي مش هتلاقيها في أي مكان تاني، وتقدر تستمتع فيها وتعمل أحلى رحلة سفاري هناك، ولو أنت من محبي التصوير هتكون رحلة عمرك مش هتنساها أبدًا، خاصة لو صورت النجوم بليل.

 الصحراء البيضاء زي السوداء بالضبط بس اختلاف اللون، وفي الغالب بتتكون الرحلات للصحراء السوداء والبيضاء، مرة واحدة، بتحس فيها بالصفاء مع اللون الأبيض المبهج.

دي كانت رحلتنا في أماكن مصرية جميلة مش كل الناس تعرفها، اهرب من القاهرة في أقرب فرصه وسافرة جوة مصر.. واستمتع