The Definitive Guide to Living in the Capital , Cairo , Egypt

مصر أعلنت عن تشغيل تجريبي للمتحف المصري الكبير قبل الافتتاح الرسمي، وبالفعل بدء المصريين والأجانب في التوجه للمتحف المصري الكبير علشان يستمتعوا بزيارة 12 قاعة تم افتتاحهم تجريبيًا، ونظرًا لأهمية المتحف وزيارته اللي بيتمناها كثر مننا، هنعرفكم على التفاصيل الكاملة لعمل جولة داخل اللمتحف تتعرفوا من خلالها على ما يمكن زيارته وأهم المقتنيات.

في البداية لازم تحجزوا التذاكر من خلال الموقع الرسمي للمتحف من هنا، وسعر التذاكر بيكون 100 جنيه للأطفال وكبار السن “فوق الـ60″، و200 جنيه للبالغين و1000 جنيه للأجانب، وتقدروا تروحوا المتحف بسيارة خاصة وده الأفضل أو من خلال المواصلات العامة ، ميكروباص أو أتوبيس، لميدان الرماية، وحتى الآن لا يوجد وسيلة مواصلات مباشرة للمتحف ولكن في القريب العاجل هيكون متاح، وطبعًا بننصحكم بمتابعة حالة الطقس لمعرفة الملابس المناسبة.

بمجرد وصولك للمتحف ومرورك من بوابة العبور، هتكون في القاعة الكبرى، وبتضم تمثال الملك رمسيس الثاني الأشهر بين المصريين واللي كان موجود في ميدان رمسيس قبل نقله، وهو أول تمثال يتم نقله رسميًا للمتحف، ووزنه 85 طن وطوله 11 متر، وكمان هتلاقوا عامود النصر للملك مرنتباج والعامود ده بيصور انتصار الفرعون على شعوب البحر.

التحرك التالي من القاعة الكبرى هيكون للقاعات الرئيسية وهتقدروا تشاركوا في رحلة مميزة للتاريخ المصري الفرعوني، وهتتعرفوا على 15 ألف قطعة من عصور ما قبل الميلاد وحتى العصر الروماني وكل قطعة لها حكاية وتاريخ عن مصر والقدماء المصريين، ومن ضمن القاعات، قاعة عصر القوة، اللي بتضم آثار المشرفين على آثار الأهرامات والحرفيين ومعاهم الفخار والمنحوتات والأدوات اللي تركوها لنا كتراث أثري مميز.

أما قاعة المعتقدات الدينية اللي هتكون بعد قاعة القوة فهتلاقوا فيها كل ما يخص طقوس الحج إلى أبيدوس وبيتم عرض آلهة القدماء المصريين بشكل كامل، وكمان الممارسات الروحية اللي كان بيعتنقها الفراعنة، ومنها هتتوجهوا إلى قاعة الدولة الحديثة، واللي بتضم ملكات مصر، وأهمهم “حتشبسوت” ملكة السلام، واللي أسست التجارة البحرية، وكمان هيكون فيه مقتنيات الملك إخناتون وتمثاله، واللي بيعرفكم على عصر التوحيد وعبادة آتون، وداخل قاعة العصر المتأخر، هتلاقوا مقتنيات تمزج بين الفن المصري والروماني، وهتتعرفوا على تأثر الحضارة المصرية بالنفوذ الأجنبي، والعصر ده كان بداية تزيين التوابيت بالصور والرسومات الرومانية واللي من بعدها حصل هيمنة في المنحوتات والتماثيل بالاتجاه الإغريقي بشكل واقعي مميز.

كمان هتعرفوا أكتر عن سفينتي “زوارق الشمس” نسبة إلى الإله رع، والشهيرة بسفينة “الملك خوفو”، وكانت مدفونة بجواره بالقرب من الهرم الأكبر لإيمانه باستخدامها في الحياة الأخرى، وحاليًا سفينة واحدة هي اللي معروضة بشكل متكامل والتانية بيجري ترميمها لإعادتها لأصلها، وبعد ما تخلصوا زيارة سفينة الملك خوفو، هتنزلوا على الدرج العظيم واللي بيضم 60 تمثال ملكي وتحف نادرة بتكشف تراث مصر الحضارة، واللي بتوضح رحلة الملوك إلى الحياة الأبدية، بداية من تماثيل الهيئة الملكية مرورًا بتماثيل الملوك في وضع التعبد، وفي آخر الدرج العظيم هتوصلوا لصالة واسعة بتطل على مقار الفراعنة والأهرامات وده دلالة على نهاية الرحلة من البداية حتى النهاية.

ولعظمة المتحف المصري الكبير والتأكيد على إلمامه بكل متطلبات الزوار هتلاقوا متحف الأطفال وفيه عروض الواقع المعزز ومجسمات تماثيل مصنوعة من مواد مستدامة، وكمان تماثيل على طريقة برايل لمساعدة المكفوفين لمعرفة أشكال التماثيل الموجودة، والمتحف موجود بعد نهاية الدرج، ومنه تقدروا تزوروا متحف الهداية والمنطقة التجارية على يمين القاعة الكبرى واللي كانت في بداية الزيارة، وهناك هتلاقوا مجموعة من المنتجات اليدوية صنعت بكل إبداع مع مجموعة من المطاعم والكافيهات للاستمتاع بمشروبكم المفضل باطلالة على القاعة الرئيسية.

المتحف المصري الكبير مفتوح يوميًا من الساعة 8:30 صباحًا حتى 6 مساءً، وزيارة القاعات بيكون من 9 صباحًا حتى 5 مساءً، وآخر موعد لشراء التذاكر عبر الموقع الاكتروني 4 مساء.