ميني إيجيبت بارك: من القاهرة لأسوان في خطوتين بس
Mohammed Sabry
مين فينا مافكرش قبل كده يزور المعالم السياحية في مصر كلها؟ بس نجيب منين الوقت والفلوس لكل ده؟ إحنا بقى في كايرو 360 قررنا نجيب لك المعالم كلها لحد عندك. ونخليك تروح من القاهرة لأسوان في خطوتين. وكل ده في مكان واحد بس، "Mini Egypt Park" في الغردقة.
كايرو 360 تواصلت مع أ/ سمير زكي، المدير الإداري لميني إيجيبت بارك في الغردقة، وعرفنا منه شوية تفاصيل عن البارك والخدمات اللي بتقدمها. فكرة البارك قايمة على تنشيط السياحة عن طريق عرض المعالم السياحية المصرية، من خلال مجسمات أو ماكيتات منفذة بشكل رائع جدًا وجذاب. وصاحب الفكرة دي هو المهندس/ وائل زكريا، اللي شافها في أكتر من بلد في العالم وقرر أنه يطبقها في مصر، بأفضل شكل ممكن.
البارك عمرها تقريبًا سنة و3 شهور. بتتكون من حوالي 55 ماكيت للمعالم السياحية المصرية القديمة والحديثة، يعني هتلاقوا فيها جزء لمصر القديمة زي المساجد والكنائس والمعابد. أو المعالم الفرعونية غير المعروفة زي معبد إدفو وكوم أمبو والرمسيون. وكمان معالم مصر الحديثة زي مجمع التحرير ومكتبة الإسكندرية. وغيرها من المنشآت القبطية والإسلامية المختلفة.
الجولات البارك بتكون on foot. وفي كمان شوية مراكب صغيرة كده، كنوع من إضافة المرح على الجولة. لكن مش جزء أساسي منها. الجميل بقى في الجولة، إن كل معلم من المعالم عليه الشرح التعريفي الخاص به بأربع لغات: عربي – إنجليزي – ألماني – روسي. يعني هتفهم هتفهم. وأكيد طبعًا تقدر تتصور انت وأصحابك أو أسرتك مع المعالم دي زي ما انت عايز.
مانقدرش ننسى المسطحات المائية في البارك، واللي معمولة على مساحة 3500 متر مربع. وعمقها 1 متر بس علشان احتياطات السلامة. مش كده بس، دي البارك كمان مجهزة للأشخاص ذوى الاحتياجات الخاصة. علشان هم كمان يقدروا يستمتعوا بكل شبر في المكان. وطبعا هتلاقي هناك مطاعم وكافيهات تقدر تاكل فيها وتستمتع بعروض التنورة والتخت الشرقي اللي بتتقدم في المكان.
نيجي بقى للنقطة الفارقة في الموضوع، وهي الفلوس. ماتقلقش، المدير الإداري للبارك أكد لكايرو 360 إن الأسعار رمزية ومناسبة جدًا للمصريين، وبتمثل تقريبًا 20% من الأسعار المخصصة للسياح. وهيبقى في كمان تسعيرة ثابتة ومعلنة مع الافتتاح الرسمي للبارك يوم 25 يناير الجي مع المحافظ.
ميني إيجيبت بارك فكرة هايلة جدًا، ومكان ممتع لأقصى درجة. تجربة لازم تمروا بيها وماتنسوش تتبسطوا وتتصوروا كتير. وممكن تتابعوا صفحتهم من هنا.
