من القاهر إلى بيروت: كل حاجة محتاج تعرفها
Nour Motawa
زيارة واحدة لبيروت
هـ تخليك تسأل نفسك ميه مرة أنا إزاي مارحتش قبل كده. الحقيقة إن بيروت هى أقرب
مكان للجنة فى الشرق الاوسط كله، مش بس عشان البلد مش كبيرة قوى ومافيهاش زحمة
والسكان اللي فيها مش كتير، بس عشان شوارعها جميلة جداً و مليانة محلات، ومطاعمها رائعة،
وفيها مزارات ثقافية وغير كده فيها اماكن سهر كتير تكفيك لغاية آخر العمر. هى بس ساعة ونص سفر بالطيارة وهـ توصل هناك، بيروت احسن مكان
ممكن تسافر له وتنسى كل حاجة شاغلك وتستمتع بسويسرا الشرق الأوسط زي ما بـ يسموها.
الوصول
لبيروت:
خطوط طيران
الشرق الأوسط عليها رحلات إلى بيروت من مطار القاهرة الدولي مرتين كل يوم. ومصر
الطيران كمان عليها رحلات إلى بيروت من القاهرة مرتين أة ثلاث مرات كل يوم. سعر
التذكرة بالنسبة للشركتين تقريباً 2000 جنيه للرحلة رايح راجع، بـ تعتمد على الموسم واليوم
اللى هـ تسافر فيه. أما العربية للطيران أو «آير آربيا» فبـ تعمل تخفيضات على أسعار
تذاكر الطيران بـ يوصل سعر التذكرة لـ1300 جنيه من مطار برج العرب الدولى في إسكندرية
وبـ تطلع الطيارة اكتر من مرة فى الإسبوع. اول ما توصل لبيروت وسيلة المواصلات
بتاعتك الأساسية هي التاكسى٬ وعلى فكرة لو طلبت التاكسى من الفندق هـ يقع عليك أغلى
عشر مرات من الطبيعي٬ عشان تتجنب ده، اسأل عن شركة من شركات التاكسي المحلية
الرخيصة والناس هـ تدلك٬ احنا بـ نقترح «كوين تاكسى».
تقعد فين؟
رغم ان بيروت
اصغر من القاهرة، لكنها غنية بأحياء كثيرة متميزة بـ تدى مجال واسع للزائرين انهم
يختاروا ويجربوا كل أكتر من طعم للمدينة الساحرة. لو انت من كائنات الليل٬ اللي
غاوية سهر٬ ماتفكرش مرتين لازم تقعد في «جميزه» واللي بـ ينطقها اللبنانيين
بالـ” چ “٬ بلكنتهم اللي تدوب وبـ تنافس المصرية
في حلاوتها. حي جميزه في افضل أماكن سهر، ومن أفضل الكافيهات. ولو
عايز تبقى قريب من مول «إيه بي سي – ABC » الكبير فى بيروت إنزل
في فندق في «الأشرفية»، ولو هـ تنزل هناك فعلاً بـ نرشحلك فندق «جولدن تيوليب دى
فيل – Golden Tulip
Hotel De Vil » لأن أسعاره مناسبة.
او ممكن
تختار فندق من الفنادق الفخمة فى حي سوليدير. ولو عايز مكان مريح وبعيد عن الدوشة،
اختار فندق فى منطقة حمرا الى فيه الجامعة الأمريكية فى بيروت، وفيه كمان من أحسن مطاعم
بيروت. ولو انتم مجموعة بنات ميزانيتكم محدودة ممكن تحجزوا في الـ«واي دبليو سي
ايه – YWCA » فى حي عين المريسة
جنب حمرا،
والمنطقة دى فيها غرف نظيفة وأمان.
هـ تاكل فين؟
صعب جداً انك
تروح بيروت ووزنك ميزدش كام كيلو على الأقل٬ لأن أكل بيروت ببساطة لايقاوم٬ ده غير
انك لازم تجرب حاجات كتير اوى زى المناقيش اللبناني الأصلي، والآيس كريم المحلي، والسلاطات،
وكل انواع اللحوم المشوية. والمناقيش على فكرة لازم تأكلها من كشك من الأكشاك اللي
في الشارع وبـ تكون سخنة وطازة من الفرن، جرب مناقيش الزعتر مع اللبنة او جبنة
حالومى، مش هـ تندم وعمرك ما هـ تنساها.
ولو عايز وجبة
رخيصة، جرب سلسلة محلات «كبايبـﭼـي» وليها فروع في كل حتة بـ يقدم شيش طاووق،
كفتة، كباب، بس خد بالك اما تيجى تطلب لإن فى لبنان الكفتة العربية معنها كباب
والكباب معناه كفتة! ولو انت فى سوليدير لازم تاكل في مطعم «البلد» وجرب عندهم
اللحمة بالعجين، ولو عايز حاجة مودرن ومش غالية روح «كافيه بلانك – «Café Blanc وهو موجود في «إيه بي
سي مول» وفي حمرا. ولو غاوي تاكل وجبات خفيفة بين الوجبات وبالأهص اللي بـ يسموه «برنش
– Brunch » (والمقصود ما بين البريكفاست واللانش٬ فبالتالي
“برنش”) جرب حمرا سيتى كافيه بـ يقدموا فيه يوم الأحد «برنش» لذيذ والقعدة بتاعته مريحة.
تعمل ايه في
بيروت؟
لو روحت
بيروت فى الصيف، اعمل حسابك انك تنزل البحر، وممكن تروح واحد من أحلى
الشواطىء هناك زى «ايد بيتش – «Edde Sands ، أو ممكن تهرب من حر الصيف وتطلع الجبل، وممكن تروح «قصر
بيت الدين» وهناك بـ يعملوا حفلات صيفية فيها احلى واشهر
الفنانين من «مارسيل خليفة» لـ«فيروز». ومن الأماكن الحلوة فى بيروت «مغارة ﭼـعيتا»
اللي مليانة بالكهوف العظيمة، وكمان كنيسة مزار سيدة لبنان «حريصا» فى « جونيه » والمكان ده ممكن توصل له بالتليفريك ومنه هـ تشوف مناظر خلابة للمدينة، ولو
عندك وقت ممكن تروح رحلة يوم كامل لـ«بعلبك»٬ مكان يخطف الروح من روعته، وتقدر
توصل له في ثلاث ساعات بالعربية من بيروت.
وممكن تتمشى
على الكورنيش وجنبك البحر فى جو بيروت الجميل او تروح وسط البلد وهناك بـ تشوف
المبانى القديمة اللي بقيت من الحرب الأهلية الأخيرة اللي حصلت قريب ووسطها
المبانى الجديدة ومباني سوليدير.وبعد كده ممكن تلف فى حمرا وهناك هـ تلاقى محلات وكافيهات
كتيرة. وانت في حمرا زور حل جرب «ارتيسنال – Artisanal » محل بـ يبيع مشغولات يدوية لبنانية وكمان محل «الإناش – «Al Inas و بـ يبيع منتجات فلسطينية
مطرزة انتاج سيدات لاجئات ببيروت.
بعد الأماكن
الثقافية مافيش أهم من التسوق٬ خصوصاً لو انت في لبنان. «إيه بي سي مول» ومحلات
وسط البلد هـ يكونوا ملجأك اليومي وهـ تلاقى فيه الماركات العالمية من «آرماني – Armani » لـ«مارك چـ يكوبز – Marc Jacobs »٬ ودي طبعاً أسعارها
بـ تكون فلكية. في محل مجمع أكتر من ماركة تحت سقف واحد واسمه «أيشتي – «Aishti فى منطقة سوليدير. ولو بـ تدور
على ذهب، ممكن تروح اى محل فى منطقة «حمرا»، المشغولات اللبنانية شيك ومصنوعة بحرفية.
هـ تسهر فين؟
الخيارات اللى
موجودة فى بيروت كتيرة جداً خاصةً لو بـ تدور على حتة تسهر فيها٬ ومن أشهر الأماكن
«سكاى بار – Sky bar » الأصلى و هو مكان مفتوح على السطح وبـ يبص
على البحر وموجود مكان زيه فى الساحل الشمالى فى مصر. ومكان تانى: «وايت – «White وده
مكان كلاسيكى وبـ يبقى مليان بأجمل البيروتيين. « B0-18 » مكان تاني تحت الأرض مظلم شوية٬ شبابي ومودرن
جداً.
مش فارق الطريقة اللي هـ تحب تقضي بيها وقتك فى
بيروت، الأكيد انك هـ تبقى عايز ترجعلها تانى، المدينة اكتر من رائعة و قريبة من
القاهرة، ومن الآخر جنة متاحة في الويكإند بسهولة.
مقترح
معالم وسياحة
متحف الصيد: مغامرة في قلب القاهرة هتاخدك لعالم الأدغال
تاريخ مصر حيوانات محنطة +7
أفلام
